2025-yil 24-iyun kuni dunyo futbolining afsonasi, “Inter Mayami” klubi hujumchisi Lionel Messi 38 yoshga to‘ldi. Yoshi anchaga borayotganiga qaramay, u hali ham yuqori darajadagi o‘yinlar namoyish etmoqda. Ushbu maqolada Messining hayoti, futbolchilik faoliyati, erishgan yutuqlari hamda uning sport yo‘li qanday davom etayotganiga nazar tashlaymiz.
Futbolchilik faoliyatini boshlanishi
Lionel Messi 1987-yil 24-iyunda Argentinaning Rosario shahrida tug‘ilgan. Oilada uchinchi farzand bo‘lgan Messi bolaligidan futbolga qiziqqan. 4 yoshida u “Grandoli” nomli kichik jamoaga qo‘shildi. Bu yerda unga otasi ustozlik qilgan, har bir mashg‘ulotga esa buvisi olib borgan. Messi deyarli har bir golini osmonni ko‘rsatish orqali nishonlaydi — bu ishora vafot etgan buvisiga bag‘ishlangan.
Keyinchalik u “Nyuells Old Boyz” yoshlar jamoasiga o‘tdi. Biroq 10 yoshida unga o‘sish gormoni yetishmovchiligi tashxisi qo‘yildi. Davolanish xarajatlarini ikki yil davomida oilasi qoplay oldi. Klub yordam berishga va’da bergan bo‘lsa-da, keyinchalik bu va’dasidan voz kechdi. 2000-yilda esa Messi hayoti keskin o‘zgaradi: “Barselona” sport direktori Karles Reshak argentinalik iqtidorni ko‘rib, uni Ispaniyaga taklif qiladi va klub uning davolanish xarajatlarini to‘liq qoplashini va’da berdi. Uning “ko‘k-anorranglilar” bilan ilk shartnomasi qog‘oz “salfetka”ga tuzilgan va shundan so‘ng Messi “La Masia” akademiyasiga qo‘shildi. 14 yoshida u davolanishni to‘liq yakunlab, “Barselona”ning asosiy jamoasiga yo‘l oldi.
“Barselona”dagi davr
2005-yil 1-iyuldan 2021-yil 10-avgustgacha Lionel Messi “Barselona” asosiy jamoasida 778 o‘yin o‘tkazib, 672 ta gol va 303 ta assist qayd etdi. U klub bilan 35 ta sovrin qo‘lga kiritdi, jumladan 4 marta Yevropa Chempionlar Ligasi (2006, 2009, 2011, 2015), 10 marta La Liga chempionligi va boshqa ko‘plab yutuqlar.
Messi 9 marta La Ligada yilning eng yaxshi futbolchisi deb topildi. U 6 ta “Oltin butsa”, 8 ta “Oltin to‘p” sohibi, FIFA va UEFA talqiniga ko‘ra bir necha bor yilning eng yaxshi futbolchisi deb e’tirof etildi.
2021-yil avgustida Messi ko‘z yoshlar bilan “Barselona”dan ketdi. Klub moliyaviy muammolar sabab uni saqlab qola olmadi. Messi ketish marosimida shunday degan edi:
“Men bu yerda qolishni istardim, bu mening uyim. Ketishga tayyor emas edim. Bu yerda 21 yil yashadim. Xotinim va uch nafar farzandim bilan Kataloniyani tark etyapman.”
Parijdagi qisqa va og‘ir davr
2021-yil avgustida Messi “PSJ” bilan shartnoma imzoladi. U bu klub safida 75 o‘yinda 32 gol va 35 assist qayd etdi. Fransiyada ikki marta chempion bo‘ldi va bir bor Superkubokni qo‘lga kiritdi. Biroq Messi uchun bu yerdagi sayohat unchalik yaxshi o‘tmadi. Murabbiy bilan ziddiyatlar, muxlislarning tanqidi va umumiy muhit uni charchatdi.
Messi keyinchalik bu davrni “tushkunlik” deb atagan, hatto “PSJ”da o‘ynagan vaqtlarini “fojiali tajriba” deb tasvirlagan.
2022-yilgi Jahon chempionatidagi muvaffaqiyat
Parijdagi murakkab davrdan fonida Messi o‘zining eng muhim yutug‘ini qo‘lga kiritdi — Qatarda o‘tgan Jahon chempionatida Argentina terma jamoasi bilan bosh sovrinni qo‘lga kiritdi.
Finalda Fransiya bilan 3:3 hisobida durang o‘ynab, penaltilar seriyasida g‘alaba qozongan argentinaliklar haqiqiy tarix yoza oldi. Messi finalda dubl qayd etdi. Bu orqali u o‘zi erishmagan yagona sovrinni qo‘lga kiritdi.
Messining terma jamoadagi umumiy statistikasi: 193 o‘yin, 112 gol.
AQShdan yangi chaqiriq: “Inter Mayami”
2023-yil yozida Messi AQShning “Inter Mayami” klubiga o‘tdi. Klub egasi — Devid Bekhem. Messi AQShga o‘tganidan beri 61 o‘yinda 50 ta gol va 24 ta assist qayd etdi. U klub bilan 2 ta sovrinni qo‘lga kiritdi hamda yana bir bor FIFA tomonidan Yilning eng yaxshi futbolchisi deb topildi.
Hozirda Messi “Inter Mayami” safida 2025-yilgi Klublar o‘rtasidagi Jahon chempionatida ishtirok etmoqda.
Messi va uning oilasi
Lionel Messi turmush o‘rtog‘i Antonella Rokusso bilan bir shahar — Rosarioda ulg‘aygan. Ular bolalikdan tanish bo‘lgan. Munosabatlari 20 yoshida jiddiy tus oldi. 2012-yilda ularning birinchi farzandi — Tiago, 2015-yilda Mateo, 2018-yilda esa Chiro dunyoga keldi. Juftlik 2017-yilda rasman nikohdan o‘tdi.
Bugungi kunda Messi nafaqat professional futbolchi, balki o‘z farzandlari uchun ham murabbiy va sportdagi ilhom manbai bo‘lib qolmoqda. Ularning barchasi “Inter Mayami” yoshlar jamoalarida to‘p surmoqda.
Lionel Messi futbol tarixida o‘z nomini abadiy muhrlagan. 38 yoshga kirganiga qaramay, u hamon yuqori darajada o‘yin ko‘rsatmoqda. Uning karyerasi yakuniga yaqinlashayotgan bo‘lishi mumkin, biroq u hali ham muxlislarini ilhomlantirishda davom etmoqda.
Izoh (0)