Fransiyadagi ko‘cha musiqasi festivalida 145 kishiga shpris sanchib ketildi. Fransiya politsiyasi 22-iyun kuni 12 nafar gumondorni qo‘lga oldi. Bu haqda CNN xabar berdi.
Hujumlar butun Fransiya bo‘ylab sodir etilgan. Parij politsiyasi poytaxtda shu kabi 13 ta holatni tasdiqlagan. Ichki ishlar vazirligi ma’lumotlariga ko‘ra, igna sanchish holatlari jabrlanuvchilarning qo‘li, oyog‘i yoki dumba sohasiga amalga oshirilgan. Shprisda “rogipnol” yoki GHB (gamma-gidroksibutirat kislotasi) kabi zo‘ravonliklarda qo‘llanadigan dorilar ishlatilgan-ishlatilmagani noma’lum.
“Vazirlik buni juda jiddiy qabul qilgan. Toksikologik tekshiruvlar o‘tkazilib, tergov davom etmoqda”, deb bayonot bergan Ichki ishlar vazirligi.
Dam olish kunlari millionlab odamlar Fête de la Musique umummilliy bayramini nishonlash uchun ko‘chalarga chiqqan. Rasmiylar Parijda odatdagidan uch-to‘rt baravar ko‘p odam bo‘lganini bildirgan. Festival arafasida Abrège Soeur kabi feminist inflyuenserlar ijtimoiy tarmoqlarda “ayollarni shpris bilan nishonga olish” haqida ma’lumotlar borligidan ogohlantirgandi.
Prokurorlar Parijda 3 kishi, jumladan, 15 yoshli qiz va 18 yoshli yigitga shpris sanchib ketilgani haqida xabar berilganidan so‘ng tergovni boshlagan.
Izoh (0)