Zamonaviy hayotimizning ajralmas qismi bo‘lib qolgan ijtimoiy tarmoqlardan ayrim mashhurlar ataylab foydalanmaydi. Kimdir tanqiddan, kimdir esa virtual xavflardan cho‘chiydi. Quyida Gollivud yulduzlarining bu boradagi qarashlari haqida hikoya qilamiz.
Skarlett Yohansson: tanqidga chiday olmaydi
Aktrisa Skarlett Yohansson ijtimoiy tarmoqlarda sahifa ochishni umuman istamaydi. Yaqinda suratga olingan “Yura davri dunyosi: Uyg‘onish” filmi reklamasini yuritish uchun prodyuserlar undan shaxsiy akkaunt ochishni so‘rashdi, biroq u taklifni qat’iyan rad etdi:
“Mening ish faoliyatim haqiqatga asoslangan. Bu karyeramning asosidir. Agar men ijtimoiy tarmoqlarni yaxshi ko‘radigan inson bo‘lganimda, albatta rozi bo‘lardim. Lekin men bunday emasman. Film muvaffaqiyati esa o‘z yo‘liga”, deydi aktrisa.
Yohansson ilgari ham ijtimoiy tarmoqlarda ko‘rinishga harakat qilgan, biroq bu urinish bir haftaga ham bormagan. Aktrisaning aytishicha, bunga uning tanqidga bardosh berolmasligi sabab bo‘lgan:
“Mening o‘zimga bo‘lgan ishonchim juda past, asablarim esa ancha tarang. Bunday tanqidlarni ko‘tara olmayman, qolaversa, hayotimda yetarlicha tashvishlarim bor”, deydi Yohhanson.
Megan Markl: qirollik oilasi tomonidan taqiqlangan
Megan Markl shahzoda Garri bilan turmush qurmasdan avval ham mashhur edi. U filmlarda suratga tushgan, The Tig taxallusi ostida blog yuritgan, u yerda mashhur shaxslar bilan intervyular, restoranlarga ta’riflar, go‘zallik bo‘yicha tavsiyalar ulashgan.
Ammo qirollik a’zosi bo‘lish evaziga Megan blogini ham, aktrisalik faoliyatini ham to‘xtatgan. Garchi yaqinda Instagram’da shaxsiy sahifa ochgan bo‘lsa-da, oldingidek ochiqchasiga hayoti bilan bo‘lishishga ruxsat yo‘q.
Teylor Svift: Piar uchun ijtimoiy tarmoqdagi sahifalarni o‘chirgan
Xonanda Teylor Svift piar borasida o‘ziga xos iste’dod egasi. Uning qo‘shiqlari ko‘p yillardan beri musiqiy chartlarda yetakchi, konsert chiptalari esa daqiqalarda sotiladi. Ko‘pchilik xonandalari yangi albom arafasida ijtimoiy tarmoqlarda faollashsa, Svift bir safar aksincha yo‘l tutdi.
2017-yilda u barcha ijtimoiy tarmoqlardan g‘oyib bo‘ldi va suratlarni o‘chirib tashladi. Oradan bir necha kun o‘tib, akkauntida faqat ilon tasvirlangan uchta post paydo bo‘ldi. Shundagina muxlislar buni “Reputation” albomi uchun reklama kampaniyasi bo‘lganini tushundi.
Sandra Bullok: internetga ishonmaydi
1995-yilda aktrisa Sandra Bullok “Tarmoq” (The Net) nomli filmda xakerlar haqida rol ijro etgach, ijtimoiy tarmoqlardan uzoqroq hayot kechira boshlagan:
“Men ushbu filmdan ko‘p narsani o‘rgandim”, deydi aktrisa. Shuningdek, u mobil ilovalarning ichki tizimlarini yaxshi tushuna olmasligini va smartfonlardan foydalanish masalasida “dangasa” ekanini aytgan.
Biroq firibgarlar uning ijtimoiy tarmoqlarda yo‘qligidan doim foydalanadi. Sandraning singlisi Jezin so‘zlariga ko‘ra, unga kuniga bir necha marta soxta akkauntlardan Sandra bilan munosabatda ekanliklariga ishongan erkaklarning xabarlariga duch kelgan. Shuning uchun aktrisa barcha muxlislarini ogohlantirib, u ijtimoiy tarmoqlarda yo‘qligini va yaqin orada ham bo‘lmasligini aytgan.
Izoh (0)