Ko‘pchilik mashhur insonlarning hayotini hashamat, muvaffaqiyat va bayramlarga to‘la, deya tasavvur qiladi. Ammo sahna ortida qanday sinovlar yashiringanini kamdan kam insonlar biladi. So‘nggi yillarda tobora ko‘proq san’atkorlar mashhurlik sari yo‘lning og‘ir tomonlari haqida ochiqchasiga aytib bermoqda. Chunki moliyaviy bosim, doimiy xavotir, shaxsiy hayot va hatto baxtdan voz kechish kabi holatlar tomoshabin ko‘ziga ko‘rinmaydigan dardlardir. Quyida taniqli aktyor va aktrisalar muvaffaqiyat sari yo‘llarida boshdan kechirgan voqealari bilan bo‘lishdi.
Pedro Paskal
Bugun Pedro Paskal Gollivudning eng taniqli aktyorlaridan biri. Uni “Taxtlar o‘yini”, “Mandalorlik” kabi loyihalardagi rollari uchun sevishadi. Ammo e’tirofga erishish yo‘li uzoq va og‘ir bo‘lgan.
“Mening muvaffaqiyatim 15 yil davom etgan kurash natijasidir”, deydi aktyor.
Bir paytlar uning hisobida atigi yetti dollar qolgan. Uni o‘sha davrda “Baffi — vampirlar ovchisi” serialidagi kichik roldan tushgan gonorar qutqarib qolgan. Bu unga kasbni tark etmaslik va davom ettirish uchun berilgan imkoniyat bo‘lgan. “Aynan shu pul tufayli aktyorlikdan voz kechmadim”, deydi Paskal.
Margo Robbi
“Uoll strit bo‘risi”, “O‘z joniga qasd qiluvchilar otryadi” va “Barbi” filmlaridan keyin Margo Robbi butun dunyoga tanildi. Ammo mashhurlik bilan birga u kutilmagan voqelarga ham duch keldi. Xususan, aktrisa o‘zining xavfsizligi haqida doimiy qayg‘urishga majbur bo‘lgan.
“Menga o‘lim bilan tahdid qilishgan. Bu quruq so‘zlar bo‘lmagan. Vaziyat shunchalik jiddiy tus olgan ediki, men xavfsizlik guruhini yollashga hamda tahdid qilgan har bir odamning o‘tmishini tekshirishga majbur bo‘lganman. Bunday ekspertizaning har biri taxminan ikki ming dollarga tushgan”, deya eslaydi u.
Kris Evans
Kris Evans Kapitan Amerika rolidan avval uzoq yillar davomida ichki kurashlar, shubhalar bilan yashagan. U Marvel olamiga qo‘shilish qarorini uzoq vaqt qabul qila olmagan.
“Kunlarning birida mendagi xavotir hissi jiddiy tus olganini sezdim. Natijada o‘zimdan uzoqlashayotganimni, kino sanoatida sog‘lom muhit kamayganini tushundim. Bir tomondan, kino orqali oila a’zolarimni butun umr moliyaviy ta’minlash imkonim bor edi. Ikkinchi tomondan esa, o‘zim qiziqmagan kasb meni baxtsiz qilishi mumkinligini ham tushunardim”, deydi aktyor.
U Gollivudda faqat vaqt yoki qiziqishlarnigina emas, balki o‘zlikni ham qurbon qilishga to‘g‘ri kelishini yashirmaydi.
Demi Lovato
Demi Lovato aktrisalik faoliyatini bolaligida “Barni va do‘stlari” loyihasi bilan boshlagan va keyinroq “Camp Rock: Musiqali ta’til” myuzikli bilan Disney yulduziga aylangan. Barchaga go‘yo orzulari ro‘yobga chiqqan qizdek tuyulgan bu yo‘l aslida og‘ir kechgan:
“Studiya bilan shartnoma tuzishdan avval tishlarim orasida kichik tirqish bor edi. Ular buni tuzatishni tavsiya qilishganda rozi bo‘ldim. Ammo hozir bu ishimdan afsusdaman, chunki bu mening o‘zimga xos tabiiy jihatim edi”, deydi u.
Rebel Uilson
Rebel Uilson “Vegasdagi qizlar bazmi” filmi orqali mashhurlikka erishgan. Ammo loyiha unga katta daromad olib kelmagan. Aksincha, aktyor bu rol uchun o‘z mablag‘ini sarflashiga to‘g‘ri kelgan.
“Mazkur film Amerikadagi birinchi ishim edi. Rol aynan menga nasib qilishi katta omadim edi, lekin gonorar juda kam — uch yarim ming dollar bo‘lgan. Bu pullar aktyorlar uyushmasiga a’zolik uchun sarflangan”, deydi u.
Izoh (0)