Panamada pensiya islohotiga qarshi davom etayotgan norozilik namoyishlari tufayli mamlakatda favqulodda holat e’lon qilindi. Bu haqda BBC xabar berdi.
Mamlakatda do‘konlar talon-taroj qilinib, binolar vayron qilingani ma’lum qilingan. Asosiy banan ishlab chiqaruvchisi bo‘lgan mamlakat hukumatning ta’kidlashicha, shimoli-g‘arbiy Boka-del-Toro provinsiyasida konstitutsiyaviy huquqlar keyingi 5 kun davomida to‘xtatiladi. Ushbu chora harakatlanish erkinligini cheklaydi va politsiyaga ordersiz hibsga olish imkonini beradi.
Mintaqadagi muammolar bir oy oldin, mahalliy banan ishchilari kasaba uyushmasi pensiyalarni qisqartirishga qarshi umummilliy norozilik namoyishiga qo‘shilib, ish tashlash e’lon qilganida boshlangan edi.
“Tartibning buzilishi va tizimli zo‘ravonlik harakatlari sharoitida davlat tinchlikni kafolatlash bo‘yicha konstitutsiyaviy mandatni amalga oshiradi”, dedi prezidentlik vaziri Xuan Karlos Orilyak.
Uning qo‘shimcha qilishicha, bu chora “provinsiyani radikallardan qutqarish” imkonini beradi. Lotin Amerikasi mamlakatida mart oyidayoq pensiya islohoti munosabati bilan norozilik namoyishlari boshlangan edi.
Boka-del-Torodagi tartibsizliklarga asosan Chiquita Brands banan plantatsiyasi ishchilari rahbarlik qilgan. Qarama-qarshilik o‘tgan oyda kompaniya ish tashlagan minglab xodimlarni ishdan bo‘shatganidan keyin avj olgan. Namoyishchilar viloyatda yo‘l to‘siqlarini o‘rnatib, politsiya bilan to‘qnash kelgan. Shu hafta boshida olomon Chiquita Brands obyektlaridan biriga, shuningdek, mahalliy aeroportga zarar yetkazgani aytilgan.
Izoh (0)