AQSH prezidenti Donald Trampning oilaviy biznesi Trump brendi ostidagi yangi telefon va xizmatni ishga tushirmoqda. Bu haqda BBC xabar berdi.
Trampning o‘g‘illari tomonidan boshqariladigan Trump Organization yaqin kelajakda oltin rangli smartfonni 499 dollar narx bilan mahalliy bozorga chiqarishini ma’lum qilgan. Shuningdek, oyiga 47,45 dollarlik mobil telefon xizmati ham taqdim etilishi ochiqlangan. Yangilik Tramp mamlakatning 45- va 47-prezidenti bo‘lgani sharafiga ishga tushirilayotgani bildirilgan.
“Tramplar oilasi prezidentning lavozimda o‘tirgan vaqtida shaxsan foyda ko‘rishining yana bir usulini yaratganiga aql bovar qilmaydi”, dedi Vashingtondagi Citizens for Responsibility and Ethics tashkilotining kommunikatsiyalar bo‘yicha direktori Megan Folkner.
Mamlakatda ehtimoliy korrupsiya va manfaatlar to‘qnashuvining yana bir vositasi paydo bo‘lmoqda, degan tushunchalar yuzaga kelmoqda. Tramp o‘zining biznes manfaatlarini farzandlari tomonidan boshqariladigan trestga topshirgan. Oq uy esa prezident barcha amerikaliklar manfaatlarini ko‘zlab ish ko‘rayotganini ta’kidlagan.
Bu qaror Tramp Apple rahbari Tim Kukni iPhone’larni AQSHda ishlab chiqarishga undayotgan bir paytda qabul qilindi. May oyida prezident Amerikada ishlab chiqarilmaydigan iPhone’larga kamida 25 foizlik import solig‘i qo‘llash bilan tahdid qilgan edi. Tahlilchilarning ta’kidlashicha, hozirda AQSHda smartfonlarni yig‘ish uchun zarur bo‘lgan yuqori texnologiyali ta’minot zanjiri yo‘q.
Mobil xizmatda savollarga javob berish uchun mijozlarni qo‘llab-quvvatlash xizmati xodimlari ishga tushiriladi. Shuningdek, ushbu oltin rangli telefonlarga hozirda oldindan buyurtma berish mumkinligi bildirilgan.
Izoh (0)