Uzbekistan Airways Toshkentdan Dubay va Sharm ash-Shayx yo‘nalishlarida qatnovchi reyslar bo‘yicha muhim axborot bilan chiqdi. 

Keltirilishicha, Eron havo hududidan foydalanish bo‘yicha joriy etilgan cheklovlar sababli Uzbekistan Airways 2025-yil 15-iyundan 30-iyungacha Toshkent–Dubay va Toshkent–Sharm ash-Shayx yo‘nalishlaridagi reyslar jadvaliga o‘zgartirishlar kiritadi:

HY333/334 reyslari:

• Toshkentdan uchish — 07:35, Dubayga yetib kelish — 11:00
• Dubaydan uchish — 12:30, Toshkentga yetib kelish — 17:30

HY341/342 reyslari (seshanba kunlari):

• Toshkentdan uchish — 08:50, Sharm ash-Shayxga yetib kelish — 13:20
• Sharm ash-Shayxdan uchish — 14:50, Toshkentga yetib kelish — 22:30

HY341/342 reyslari (chorshanba va yakshanba kunlari):

• Toshkentdan uchish — 08:35, Sharm ash-Shayxga yetib kelish — 13:05
• Sharm ash-Shayxdan uchish — 14:35, Toshkentga yetib kelish — 22:15

Vaziyat yuzasidan

Isroildagi o‘zbekistonliklarga zaruriyatsiz ko‘ngilochar joylarga bormaslik tavsiya qilingani haqida xabar berilgandi.

13-iyun kuni kechqurun Eron Isroilga ballistik raketalar bilan ommaviy hujum uyushtirdi. Tel-Aviv va Quddusda portlashlar bo‘ldi. Ushbu hujum tufayli yetkazilgan zarar va jabrlanganlar haqida allaqachon ma’lumotlar paydo bo‘ldi.

Eronning Isroilga qarshi amalga oshirgan to‘rt bosqichli raketa hujumi oqibatida 3 kishi halok bo‘ldi va kamida 70 kishi jarohat oldi.

Eron havo hududi yopilgani sabab shu kuni Uzbekistan Airways aviakompaniyasining Toshkent—Jidda yo‘nalishidagi HY5343 reysi, Fly Dubai aviakompaniyasining Toshkent—Dubay yo‘nalishidagi FZ1942 reysi Toshkentga qaytishga majbur bo‘ldi.

Air Cairo aviakompaniyasining Olmaota—Sharm ash-Shayx yo‘nalishi bo‘yicha SM882 reysi va Qatar Airways aviakompaniyasining Seul—Doha yo‘nalishi bo‘yicha QR8985 reysi Toshkent aeroportiga favqulodda qo‘ndi.

Bundan tashqari, Eron havo hududi yopilgani sabab 13-iyunda Toshkentdan uchadigan:

• Fly Dubai aviakompaniyasining Dubay—Toshkent—Dubay yo‘nalishi bo'yicha FZ-1945/1946 reyslari;
• Air Arabia aviakompaniyasining Sharja—Toshkent—Sharja yo‘nalishi bo‘yicha G9-270/271 reyslari;
• Asia Union aviakompaniyasining Toshkent—Madina—Toshkent yo‘nalishi bo‘yicha 7q-141/142 reyslari bekor qilindi.

Bundan tashqari, 

Tel-Aviv Ben-Gurion aeroporti va mintaqa havo makonining vaqtincha yopilishi munosabati bilan 15-iyun kungi 9S 501/502 Samarqand—Tel-Aviv reysi bekor qilindi.

Isroilga boshqa sanalardagi reyslar haqida qo‘shimcha ravishda xabar berilishi aytildi.

Reysi bekor qilingan barcha yo‘lovchilar oldindan e-mail orqali, shuningdek chiptalarni xarid qilgan joylarda — kassalar va sayyohlik agentliklarida xabardor qilinishi aytildi.

Uzbekistan Airways, shuningdek, Toshkent–Tel-Aviv–Toshkent yo‘nalishidagi reyslar yo‘lovchilari uchun shoshilinch axborot bilan chiqdi. Tel-Aviv xalqaro aeroportida havo hududidan foydalanish bo‘yicha joriy etilgan cheklovlar sababli Uzbekistan Airways 2025-yil 16-iyundan 30-iyungacha Toshkent–Tel-Aviv–Toshkent yo‘nalishidagi reyslarni vaqtincha to‘xtatishga majbur bo‘ldi.