Bojxona qo‘mitasi fuqarolarga shaxsiy avtotransport vositalarini ishonchnoma orqali begona shaxslar tasarrufiga berishda hushyorlikni oshirish zarurligini bildirib, ogohlantirish bilan chiqdi.
Qayd etilishicha, so‘nggi vaqtlarda mamlakatda ro‘yxatdan o‘tgan yengil avtotransport vositalari ishonchnoma asosida davlat chegaralari orqali olib chiqilib, so‘ngra qo‘shni davlatlarda noqonuniy ravishda sotib yuborilayotgan holatlar aniqlanmoqda.
Bojxona qo‘mitasi huzuridagi tezkor tuzilmalar tomonidan bu kabi qonunbuzarliklarni fosh etish bo‘yicha muntazam tezkor-qidiruv tadbirlari olib borilmoqda. Masalan, 2025-yil 28-yanvar kuni “Malik” chegara o‘tkazish punktida qo‘shni davlat fuqarosi boshqaruvida kirib kelgan Lacetti 2024-yil 24-iyunda O‘zbekiston fuqarosi tomonidan ishonchnoma asosida olib chiqilgani va hozirda qidiruvda ekani aniqlangan.
Shu kabi holatlar “G‘ishtko‘prik”, “Xovosobod”, “Sariosiyo”, “Oybek” va “Andarxon” chegara postlarida ham qayd etilgan. Ushbu avtomobillar ilgari ishonchnoma asosida chiqarilgan bo‘lib, bugunga kelib qidiruvga berilgan.
Bundan tashqari, Bojxona qo‘mitasi tomonidan ijaraga berilgan avtotransport vositalarining chegaradan chiqarilib, chet davlatlarda noqonuniy sotilayotgani yuzasidan ham keng qamrovli tadqiqot ishlari olib borilmoqda. Ayni vaqtda 6 nafar fuqaro tomonidan ijaraga olingan 100 ga yaqin avtomobil chegaradan olib chiqilib, boshqa davlatda sotib yuborilgani bo‘yicha tezkor-qidiruv choralari amalga oshirilmoqda.
Bojxona xodimlari har bir transport vositasi chegara postidan o‘tayotganda haydovchining shaxsini, transport hujjatlarini hamda zarur hollarda ishonchnoma mavjudligini tekshiradi. Axborot tizimlari integratsiyasi orqali qidiruvdagi avtomobillar aniqlanib, joyida to‘xtatilmoqda.
Shu munosabat bilan Bojxona qo‘mitasi fuqarolardan shaxsiy avtotransport vositalarini ishonchnoma orqali topshirishda maksimal darajada hushyorlikni saqlashni so‘radi. Agar ishonchnoma asosida berilgan avtotransportni qaytarib olishda qiyinchilik yuzaga kelgan bo‘lsa, zudlik bilan huquqni muhofaza qiluvchi organlarga murojaat etish tavsiya etildi.
O‘zbekistonda yangi avtomobillar uchun bojxona to‘lovlarini hisoblash tartibi o‘zgartirildi.
Yangi avtomobillarga (3 yilgacha bo‘lgan) 2 xil import boji o‘rnatilgan:
- ishlab chiqarilganiga 1 yilgacha bo‘lgan;
- ishlab chiqarilganiga 3 yilgacha bo‘lgan.
Vaholanki, ular bugungi kunda bitta kodda tasniflanadi — 8703 21 10.
Avtomobil ehtiyot qismlariga 2 xil import boji stavkasi o‘rnatilgan:
- yangisiga — 5 foiz;
- ilgari foydalanilganiga — 15 foiz.
Biroq ular ham bitta TIF TN kodda tasniflanadi. Ularning yangi yoki ishlatilgan ekanligini aniqlaydigan mezon esa aniq belgilanmagan. Shu sababli 3 oy muddatda avtotransport vositalarining ehtiyot va butlovchi qismlari yangi yoki avval foydalanishda bo‘lganligini aniqlovchi mezonlarni va tartibini nazarda tutuvchi normativ-huquqiy hujjat loyihasi ishlab chiqiladi.
Izoh (0)