Islom Karimov nomidagi Toshkent xalqaro aeroportida uchib kelish zali rekonstruksiyasining birinchi bosqichi yakunlandi va zalning yangilangan o‘ng qismi foydalanishga topshirildi, deb xabar bermoqda Uzbekistan Airports matbuot xizmati.
Ma’lum qilinishicha, zalning umumiy maydoni kengaytirildi, avtotransport va avtobuslar uchun yangi yo‘lak qurildi, 120 o‘rinli avtoturargoh tashkil etildi va yashil hudud barpo etildi.
Bino fasadining kengayishi uchib kelish zali maydonini 2 100 kvadrat metrga oshirish imkonini berdi. Natijada bojxona hududi kengaytirildi, qo‘shimcha yuk karuseli o‘rnatildi, terminal ichida kutib oluvchilar uchun ilk bor 120 o‘rindiqli hudud tashkil etildi.
“Bugun terminalning o‘ng qismini kengaytirish ishlari yakunlandi. Chap qismini rekonstruksiya qilish ertadan boshlanadi. Aeroport faoliyatini to‘xtata olmaganimiz uchun bosqichma-bosqich ishlarni amalga oshirishni rejalashtirganmiz”, dedi Uzbekistan Airports qurilish boshqarmasi mutasaddilari.
Kutib oluvchilar maydonidan tashqari, qisqa muddatli to‘xtash uchun zalga tutashgan maxsus ajratilgan yo‘lak ochildi. Endi zal oldiga taksida ham, shaxsiy avtomobillarda va avtobuslarda ham kirish mumkin — yo‘lakda turish vaqti jo‘nab ketish zalidagi yo‘lak kabi 10 daqiqani tashkil etadi.
Toshkent xalqaro aeroporti rekonstruksiyasi
Toshkent xalqaro aeroportida keng ko‘lamli qurilish va rekonstruksiya ishlari 2023-yil dekabrda boshlangan edi. Ayni paytda Toshkent xalqaro aeroporti terminalining o‘tkazish qobiliyati yiliga 7 million yo‘lovchini tashkil etadi. Poytaxt aeroportida 6,8 million yo‘lovchiga xizmat ko‘rsatish rejalashtirilgan.
Rekonstruksiyaning ikkinchi bosqichini 2025-yil oxirigacha yakunlash rejalashtirilgan. Uning davomida qo‘shimcha yuk tashish kamarini o‘rnatish, kafelar, do‘konlar va boshqa xizmatlar joylashgan kutib oluvchilar hududini kengaytirish nazarda tutilgan.
Yakuniy bosqich — kelish va jo‘nash zallarini yagona terminal majmuasiga birlashtirish. Ishlar yakunlangach, terminalning umumiy maydoni 10 000 kvadrat metrdan oshadi, o‘tkazish qobiliyati esa soatiga 2400 yo‘lovchiga yetkaziladi.
Mart oyida Andijon xalqaro aeroportida aerodrom rekonstruksiyasining birinchi bosqichi yakunlanib, muntazam yo‘lovchi qatnovlarini qabul qila boshlagandi. May oyi oxirlarida Surxondaryo viloyatidagi Sariosiyo aeroporti 30 yillik uzilishdan so‘ng faoliyatini tikladi.
Izoh (0)