Bizda nuqul hayvonlar bir g‘alvani boshlab yuradi: ko‘rsichqonlar ombor o‘maradi, laqqabaliqlar suvomborini qulatadi, mana endi qo‘ylar namoyish tashkil qilib yuboribdi. Baayni Gulxaniy boboning “Zarbulmasal”i deysiz.
6-aprel kuni Samarqand viloyatining Nurobod tumanida ajoyib tomosha bo‘ldi. Odamlar minglab qo‘yni hokimlik binosi oldiga haydab keldi. Bu voqeaning tarixi quyidagichadir. Respublika Pillachilik va qorako‘lchilikni rivojlantirish qo‘mitasi tomonidan «Samarqand qorako‘l klaster» MCHJ korxonasiga 151 ming gektar hamda Sp Luxe MChJ qo‘shma korxonasiga 197 243,4 gektar yaylov yer maydonlari ajratilgan. Klaster Sp Luxe MChJ va Qorako‘lcha mavzesida faoliyat ko‘rsatayotgan “Sohibkor Hojiakbar” fermer xo‘jaligi o‘rtasida 49 yilga 834 gektar yaylov yer maydonini ijaraga olish bo‘yicha shartnoma tuzilgan bo‘lib, unda 1 450 bosh mayda shoxli molni boqish ko‘rsatilgan bo‘lsa-da, ushbu yer maydonida fermer xo‘jaligi rahbari tomonidan 4 mingdan ziyod chorva moli boqilgani “Qilichli” mahallasi fuqarolarining noroziligiga sabab bo‘lgan. Shundan so‘ng klasterning 1 450 bosh qo‘yini mahalliy aholi o‘sha kuni soat 16:00 larda tuman markaziga haydab keldi. Qo‘ylar ma’rab hammayoqni boshiga ko‘tardi.
Shundan keyin Nurobod tumani hokimi Faxriddin Zoyirovning xabar qilishicha, “...shu kunning o‘zida klaster korxonasi ta’sischisi, fermer xo‘jaligi va aholi bilan ushbu masala yuzasidan gaplashib, fermerning belgilanganidan ortiqcha chorvasi bu yerdan chiqarib yuborildi. Shuningdek, mahalla hududida yana 2-3 ta fermer mas’uliyati cheklangan jamiyat tarzida korxona tashkil etib, ularga aholi a’zo bo‘lishi va klaster bilan shartnoma asosida ish olib borishga kelishib olindi”. Hokimlik oldiga qo‘y haydab kelganlarga esa hech qanday chora ko‘rilmaydigan bo‘ldi.
Qo‘ylar mitingi ijtimoiy tarmoqlarda katta aks sado berdi. Quyida har qanday muammoni yechib beruvchi reshala-qo‘yga atalgan karikatura.
* * *
O‘tayotgan hafta o‘simlik yog‘i narxi keskin oshgani bilan hammaning esida qoldi. Oddiy xalq iste’mol qiladigan paxta yog‘i 50 mingdan 70 minglik cho‘qqiga sakradi, kungaboqar yog‘ining narxi esa 95-100 ming so‘mni qoralab qo‘ydi. Xo‘sh, bunga qadrdon monopolistlarimiz sababchimi yoki dunyo bozoridayam holat shunaqami? Ma’lum bo‘lishicha, narxlarimizni dunyo bozoridagi tendensiyalar tebratmoqda. Qo‘shni davlatlarda ham o‘simlik yog‘i oshgan.
O‘zbekiston Monopoliyaga qarshi kurashish qo‘mitasi bildirishicha, 2020-yilda aholi iste’moli uchun 450 ming tonnadan ortiq o‘simlik yog‘i muomalaga chiqarilgan bo‘lib, shundan yarmidan ortig‘i import qilingan. Bunda, Sanitariya qoida va me’yorlariga muvofiq, respublika bo‘yicha o‘simlik yog‘i talab yiliga 300 ming tonnadan ortiq deb baholanmoqda. Ichki bozorlarda narxlar keskin o‘sishiga tashqi jahon bozorlarida narxlar oshishi va o‘tgan hosil yilida yetishtirish hajmlari nisbatan kamroq bo‘lishi munosabati bilan asosiy yetkazib beruvchilardan bo‘lgan qo‘shni davlatlarda kungaboqar yog‘i va urug‘i eksportiga yuqori bojxona bojlari belgilanishi tartibi muddati uzaytirilishi ham ta’sir etgan. Import qilinadigan kungaboqar yog‘i va urug‘i narxlarining oshishi mahalliy paxta yog‘i narxlariga ham bevosita o‘z ta’sirini ko‘rsatgan.
Bozorlarda esa yog‘ uchun turnaqator navbatlar paydo bo‘lmoqda. “Davletov.uz” poytaxt bozorlaridan birida arzonlashtirilgan yog‘ uchun navbat fotosuratini joyladi.
* * *
8-aprel kuni prezident Shavkat Mirziyoyev o‘tkazgan videoselektor tanqidiy ruhda bo‘ldi. Selektorda Qashqadaryo viloyati hokimi Zoir Mirzayev, viloyat prokurori Tojiyev, ichki ishlar boshlig‘i Sotvoldiyevga hamda Navoiy viloyati hokimi Qobil Tursunov va viloyat prokurori Ahmedovga hayfsan berildi.
“Qat’iy ogohlantirish: chorak yakunigacha o‘zgarish bo‘lmasa, barchasi ishdan ketadi. Navoiy viloyati ichki ishlar boshlig‘i Tasbayev va soliq rahbari Botiraliyevlar lavozimiga 2021-yil mart oyida tayinlanganini inobatga olib, ularga 3 oy sinov muddati. Ushbu yangi rahbarlar ham natija ko‘rsatmasa, lavozimidan olinadi”, – dedi Prezident. Ulug‘nor, Uzun, Yozyovon, Dehqonobod tumanlari hokimlarining birinchi o‘rinbosarlari, Andijon, Oltinko‘l, Olot, Qorako‘l, Oqoltin, Chilonzor, Mo‘ynoq tumanlari, Xiva va Chirchiq shaharlari soliq idoralari boshliqlari ham lavozimidan ozod etildi. Prezident bank faoliyatini ham tergadi.
“Tuman, shahar hokimlari esa, sektor rahbarlari bilan birga, kichik tadbirkorlar bilan kuniga 3 marta (kerak bo‘lsa, kechasi ham) o‘zining sektorida uchrashadi, muammolarini hal qiladi... Viloyat, tuman va shahar hokimlari bir hafta muddatda har bir tuman va shahar kesimida tadbirkorlar bilan ishlash tizimini aniq hisob-kitoblar asosida qanday tashkil etishi va kutilayotgan natijalar bo‘yicha kafolat xati yozib beradi”, – dedi Shavkat Mirziyoyev.
“Ishdan olinganlar ishlagan davri uchun hamma oyligini davlatga topshirsin. Televizorda rasmini chiqarib, ‘xiyonatchi’ deb berish kerak. Xalq bularning kimligini, siyosatga qarshi ekanini bilishi kerak”, – deb qo‘shimcha qildi prezident.
* * *
Eng ishonchli va tezkor transportlardan bo‘lgan metro ham muammo chiqarmoqda. Toshkent ko‘rki hisoblangan yerosti transporti bu hafta 2-3 marta noqulay vaziyatga sabab bo‘ldi.
1. 8-aprel soat 10:45 da Sergelidan keluvchi poyezd yerusti yo‘lida to‘xtab qoldi. Yo‘lovchilar 15 daqiqa kutib so‘ng piyoda yo‘lga tushdi. Yo‘lda ular sostavni energiya bilan ta’minlovchi qurilmalar parchalanib ketganini ko‘rgan. Keyinroq bu yo‘nalish bo‘yicha vaqtincha bepul avtobus qo‘yildi. Shu kuni kechga yaqin “Toshkent metropoliteni” rahbariyati muammoni aniqlab, bartaraf etdi. Sergeli yo‘nalishidagi poyezd to‘xtashiga sabab kontakt relsining kronshteyni ushlab turish qurilmalaridan chiqib ketganligi ekan. Voqea yuzasidan rasmiy tergov bo‘layotgani aytildi. Metro harakati esa tiklandi.
2. Ijtimoiy tarmoqlarda “Beruniy” metro bekatida ikki poyezd to‘qnashgani aytilgan video tarqaldi. Videoda ikki poyezd go‘yoki bir-biriga urilib ketgandek ko‘rinadi. Yaxshiki, bu xabar noto‘g‘ri bo‘lib chiqdi. Toshkent metropoliteni izoh berishicha, shu kuni soat 8:40 da, texnik sabablarga ko‘ra “G‘afur G‘ulom” bekatida yo‘lovchilar poyezddan tushirilib, zaxiraga kelgan navbatdagi poyezdga o‘tkazib yuborilgan. Yo‘lovchilar tushirilgan poyezd boshqa poyezd yordamida shatakka olib “Beruniy” bekatiga olib kelingan. Shu holatni yo‘lovchi videoga olgan. Yolg‘on ma’lumot tarqatganlik uchun esa jazo bor.
3. Metrodagi hamma nosozliklar shu haftaga tiqilganmikan, Chilonzor yo‘nalishidagi poyezdning eshigi buzilib qoldi. “Pushkin” va “Buyuk ipak yo‘li” bekatlari oralig‘ida vagonning eshigi yopilmagan holda harakatlandi. “Bunaqa dahshatni faqat triller kinolarda ko‘rish mumkin edi, ammo o‘z ishiga mas’uliyatsiz insonlarning kasriga, ming afsuski, bizda bunaqa holatlar kundalik voqeaga aylanib qolayotgandek. Ishqilib oxiri baxayr bo‘lsin. Bunga javob beradigan biror zot bormi?”, — deb yozdi bloger Xushnudbek Xudoyberdiyev. “Toshkent metropoliteni” rahbariyati “triller” uchun darhol uzr so‘radi va tekshiruv boshlaganini ma’lum qildi. Shu kuni kechga borib xizmat vazifalarini noto‘g‘ri bajargani uchun mashinist, elektromontyor-chilangar va elektr harakatlanuvchi tarkibning katta ustasi egallab turgan lavozimidan ozod etilgani e’lon qilindi. Shuningdek, elektr bazasi boshlig‘ining elektr harakatlanuvchi tarkibini ta’mirlash bo‘yicha o‘rinbosari ish haqining 40 foizi miqdorida jarimaga tortilgan.
O‘zbekiston va dunyo xabarlaridan eng birinchi voqif bo‘lish uchun “Daryo”da qoling. Metroda ehtiyot bo‘ling.
Izoh (0)