Jizzaxda Prezident qarori bilan xalqaro umummavsumiy tog‘-chang‘i kurorti tashkil etiladi

Shavkat Mirziyoyevning “Zomin” turistik-rekreatsion zonasi faoliyatini hamda xalqaro umummavsumiy tog‘-chang‘i kurortini tashkil etish chora-tadbirlari to‘g‘risida”gi qarori loyihasi e’lon qilindi.

Turizmni rivojlantirish davlat qo‘mitasi, Investitsiyalar va tashqi savdo vazirligi va Jizzax viloyati hokimligining:

• Jizzax viloyatining “Zomin” turistik-rekreatsion zonasini tashkil etish;
• erkin turistik zona hududida zamonaviy mehmonxona majmualari, madaniy-sog‘lomlashtirish, savdo-ko‘ngilochar va turistik ahamiyatdagi boshqa obyektlar qurish, shuningdek, zamonaviy muhandislik infratuzilmasi obyektlarini tashkil etish to‘g‘risidagi takliflariga rozilik berilishi mumkin.

Quyidagilar erkin turistik zonaning asosiy vazifalari va faoliyat yo‘nalishlari etib belgilanadi:

• erkin turistik zonada zamonaviy turizm infratuzilmasi obyektlari (mehmonxona majmualari, madaniy-sog‘lomlashtirish, savdo-ko‘ngilochar va turistik ahamiyatdagi boshqa obyektlar)ni, turistlarga xizmat ko‘rsatish uchun zarur sharoitlarni ta’minlagan holda maxsus funksional va mavsumiy rekreatsion dam olish zonalarini yaratish bo‘yicha loyihalarni amalga oshirish uchun xorijiy va mahalliy investorlarning investitsiyalarini jalb qilish;
• hududning ekomuhiti imkoniyatlarini hisobga olgan holda o‘ziga xos turistik yo‘nalishlarni tashkil etish;
• transport vositalarining arzonligini ta’minlash, hududda transport harakatining yangi (avtobus, mikroavtobus, funikulyor va boshqalar), shu jumladan, muqobil energiya manbalarida harakatlanuvchi turlarini joriy etish, yo‘lovchi transporti yo‘nalishlarini kengaytirish, uning to‘xtovsiz harakatini tashkil etish, tegishli transport infratuzilmasini rivojlantirish;
• turistlar xavfsizligining qo‘shimcha sharoitlarini, shu jumladan, turistik infratuzilma obyektlarini videokuzatuv tizimlari bilan jihozlash, ogohlantirish tizimlarini tashkil etish, hududga keluvchi turistlar haqida yagona ma’lumotlar bazasini, favqulodda holatlarda tez yordam berish tizimini joriy etish yo‘li bilan yaratish;
• erkin turistik zona hududida loyihalarni amalga oshirayotgan va faoliyat yuritayotgan tadbirkorlik subyektlari hamda investorlar (shu jumladan, xorijiy investorlar) uchun belgilangan alohida bojxona va soliq rejimlarini ta’minlash;
• energiyaning muqobil va qayta tiklanuvchi manbalarini qo‘llagan holda yangi zamonaviy energiya tejovchi tizimlar va texnologiyalarni joriy qilish asosida o‘ziga xos ekologik tizimni yaratish bo‘yicha loyihalarni amalga oshirish;
• hududda noyob tabiiy obyektlar va majmualarni, o‘simliklar va hayvonlarning genetik fondini saqlash, shuningdek, faoliyatning atrof-muhitga salbiy ta’sirining oldini olish va minimallashtirish bo‘yicha chora-tadbirlarni amalga oshirish.

Qayd etilishicha, Turkiyaning “Idealist” kompaniyasi tomonidan Zomin tumanida erkin turistik zonaning bosh rejasi loyihasi ishlab chiqilgan. Ushbu bosh reja loyihasida investitsiyalarni, shu jumladan, turizm (joylashtirish vositalari, dor yo‘llari, restoranlar, savdo shoxobchalari va boshqa turizm infratuzilmasi obyektlari), yo‘l-transport va kommunal infratuzilmani rivojlantirishga yo‘naltirilgan mablag‘larini jalb qilish nazarda tutilgan.

Turizmni rivojlantirish davlat qo‘mitasi Qurilish vazirligi, Jizzax viloyati hokimligi, manfaatdor vazirlik va idoralar bilan birgalikda 2021-yil 1-iyunga qadar xorijiy loyiha institutlarini, shuningdek, maslahatchilarni jalb qilgan holda erkin turistik zonaning batafsil rejalashtirish loyihasini quyidagilarni nazarda tutgan holda ishlab chiqadi va belgilangan tartibda tasdiqlanishini ta’minlaydi:

• hududdagi elektr tarmoqlarini yer ostidan o‘tkazish;
• erkin turistik zona hamda uni boshqa hududlar bilan bog‘lovchi yo‘llarda maxsus piyodalar va velosiped yo‘laklari mavjud bo‘lishi;
• hududdagi elektromobillar va boshqa turdagi transport vositalari (quvvat oluvchi gibrid transport vositalari) uchun umumiy quvvati 11 kilovattdan kam bo‘lmagan holda, elektr quvvatlanish stansiyalari nuqtalarini belgilash;
• hududda o‘rnatilgan tartibda aeronavigatsiya vositalari va kichik sig‘imdagi havo kemalari (vertolyotlar) uchun uchish-qo‘nish maydonchalarini joylashtirishni belgilash;
• sportning ekstremal turlari, shu jumladan ziplayn, fotosuratlar olish uchun manzarali va noyob joylarda selfi zonalar kabi obyektlarni joylashtirish;
• hududda o‘rnatiladigan yo‘l ko‘rsatkichlarining joylashish nuqtalarini belgilash;
• suvenir va oziq-ovqat mahsulotlari savdosi joylashtirilishini nazarda tutuvchi turistik ko‘chalarni joylashtirish;
• xorijiy mamlakatlarning ijobiy sinovidan o‘tgan tajribasini o‘rgangan holda hududda chiqindilarni tashlash hamda namunaviy sanitariya-gigiyena shoxobchalarini joylashtirish nuqtalarini belgilash;
• Ichki ishlar vazirligi, Ekologiya va atrof-muhitni muhofaza qilish davlat qo‘mitasi, Axborot texnologiyalari va kommunikatsiyalarini rivojlantirish vazirligi va Jizzax viloyati hokimligi bilan birgalikda 2021-yil 1-mayga qadar o‘rnatilgan tartibda erkin turistik zona hududiga kirish nuqtasida milliy valyutada to‘lovlarni qabul qiluvchi xizmat ko‘rsatish punkti va zamonaviy avtoturargoh tashkil etilishini ta’minlaydi.

Erkin turistik zona hududida “Suffa platosi.2400” xalqaro umummavsumiy kurorti va “O‘riklisoy” turizm majmuasi tashkil etiladi.

Avvalroq Xonobodda mineral suv ishlab chiqarish va dam olish zonasi tashkil etilishi, Navoiyda loyiha qiymati 6 million dollar bo‘lgan dam olish maskani ish boshlagani hamda Toshkentning eski shahari “ochiq osmon ostidagi muzey”ga aylantirilishi haqida xabar berilgandi.