Божхона қўмитаси фуқароларга шахсий автотранспорт воситаларини ишончнома орқали бегона шахслар тасарруфига беришда ҳушёрликни ошириш зарурлигини билдириб, огоҳлантириш билан чиқди.
Қайд этилишича, сўнгги вақтларда мамлакатда рўйхатдан ўтган енгил автотранспорт воситалари ишончнома асосида давлат чегаралари орқали олиб чиқилиб, сўнгра қўшни давлатларда ноқонуний равишда сотиб юборилаётган ҳолатлар аниқланмоқда.
Божхона қўмитаси ҳузуридаги тезкор тузилмалар томонидан бу каби қонунбузарликларни фош этиш бўйича мунтазам тезкор-қидирув тадбирлари олиб борилмоқда. Масалан, 2025 йил 28 январь куни “Малик” чегара ўтказиш пунктида қўшни давлат фуқароси бошқарувида кириб келган Lacetti 2024 йил 24 июнда Ўзбекистон фуқароси томонидан ишончнома асосида олиб чиқилгани ва ҳозирда қидирувда экани аниқланган.
Шу каби ҳолатлар “Ғишткўприк”, “Ховособод”, “Сариосиё”, “Ойбек” ва “Андархон” чегара постларида ҳам қайд этилган. Ушбу автомобиллар илгари ишончнома асосида чиқарилган бўлиб, бугунга келиб қидирувга берилган.
Бундан ташқари, Божхона қўмитаси томонидан ижарага берилган автотранспорт воситаларининг чегарадан чиқарилиб, чет давлатларда ноқонуний сотилаётгани юзасидан ҳам кенг қамровли тадқиқот ишлари олиб борилмоқда. Айни вақтда 6 нафар фуқаро томонидан ижарага олинган 100 га яқин автомобиль чегарадан олиб чиқилиб, бошқа давлатда сотиб юборилгани бўйича тезкор-қидирув чоралари амалга оширилмоқда.
Божхона ходимлари ҳар бир транспорт воситаси чегара постидан ўтаётганда ҳайдовчининг шахсини, транспорт ҳужжатларини ҳамда зарур ҳолларда ишончнома мавжудлигини текширади. Ахборот тизимлари интеграцияси орқали қидирувдаги автомобиллар аниқланиб, жойида тўхтатилмоқда.
Шу муносабат билан Божхона қўмитаси фуқаролардан шахсий автотранспорт воситаларини ишончнома орқали топширишда максимал даражада ҳушёрликни сақлашни сўради. Агар ишончнома асосида берилган автотранспортни қайтариб олишда қийинчилик юзага келган бўлса, зудлик билан ҳуқуқни муҳофаза қилувчи органларга мурожаат этиш тавсия этилди.
Ўзбекистонда янги автомобиллар учун божхона тўловларини ҳисоблаш тартиби ўзгартирилди.
Янги автомобилларга (3 йилгача бўлган) 2 хил импорт божи ўрнатилган:
- ишлаб чиқарилганига 1 йилгача бўлган;
- ишлаб чиқарилганига 3 йилгача бўлган.
Ваҳоланки, улар бугунги кунда битта кодда таснифланади — 8703 21 10.
Автомобиль эҳтиёт қисмларига 2 хил импорт божи ставкаси ўрнатилган:
- янгисига — 5 фоиз;
- илгари фойдаланилганига — 15 фоиз.
Бироқ улар ҳам битта ТИФ ТН кодда таснифланади. Уларнинг янги ёки ишлатилган эканлигини аниқлайдиган мезон эса аниқ белгиланмаган. Шу сабабли 3 ой муддатда автотранспорт воситаларининг эҳтиёт ва бутловчи қисмлари янги ёки аввал фойдаланишда бўлганлигини аниқловчи мезонларни ва тартибини назарда тутувчи норматив-ҳуқуқий ҳужжат лойиҳаси ишлаб чиқилади.
Изоҳ (0)