Xitoy ommaviy axborot vositalarining xabar berishicha, mamlakatda COVID-19 tarqalishining oldini olishdagi kamchiliklar tufayli 30 dan ortiq kadrlar turli darajadagi javobgarlikka tortilgan.
Xabarlarga ko‘ra, ayrim shaharlarda vitse-mer darajasidagi bir nechta mansabdorlar, shahar okrugi rahbarlari, mahalliy sog‘liqni saqlash qo‘mitalari va tibbiyot muassasalari rahbarlari o‘z lavozimidan ayrilgan.
Xususan, Xitoyning Szyansu provinsiyasi sharqidagi Nankin shahrida mahalliy aeroportda koronavirus tarqalishi tufayli 15 amaldor jazolandi.
Ta’kidlanishicha, Nankin shahri vitse-meri Xu Vanjin epidemiyaga qarshi kurash vazifalarini samarasiz bajargani uchun jarimaga tortilgan. Mahalliy sog‘liqni saqlash komissiyasi rahbari Fang Chjunyu ham jazolangan, u sifatsiz ish uchun lavozimidan chetlatilib, “jiddiy ogohlantirish” olgan. Tergov natijasida Eastern Airports bosh direktorining o‘rinbosari Van Chao qo‘lga olingan. Bu tashkilot aeroportda infeksiyalarni nazorat qilish bilan shug‘ullanadi. OAV xabariga ko‘ra, tergov olib borilayotgani sababli jinoyatchilar soni ortishi mumkin.
Qayd etilishicha, Nankin Lukou xalqaro aeroporti mamlakat bo‘ylab 20 dan ortiq shaharga tarqalgan delta shtammining ehtimoliy manbasi hisoblanadi. Mazkur shtamm yoyila boshlagach butun mamlakat bo‘ylab aeroportlar va bojxona koronavirus tarqalishining oldini olish uchun qattiqroq choralar ko‘rdi.
Xitoy hukumati mamlakatda infeksiya tarqalishini to‘xtata olmayapti. Xitoy Sog‘liqni saqlash davlat qo‘mitasining ma’lumotlariga ko‘ra, 8-avgust kuni Xitoyda 125 kishida koronavirus aniqlangan, ulardan 94 nafari mamlakat ichida: Xenan provinsiyasida — 41, Szyansu viloyatida — 38, Xunan viloyatida — 12, va Xubey viloyatida — 3 kishi.
COVID-19 tufayli Xitoy o‘z fuqarolariga xorijga chiqish pasporti berishni vaqtincha to‘xtatmoqchi. Xitoyliklar faqat favqulodda holatlardagina mamlakatni tark etish uchun ruxsat olishi mumkin bo‘ladi. Hukumat boshqa davlatga safar qilish bo‘yicha berilgan arizalarni qat’iy tekshiradi.
Iyul boshida butun dunyoda delta shtamm tarqalayotgani oqibatida Xitoyda ham COVID-19 bilan kasallangan bemorlar ko‘paya boshladi. Koronavirus yuqtirib olish holatlari tufayli Xitoyning bir nechta shaharlarida aeroportlar yopildi, poyezdlar harakati cheklandi va karantin joriy etildi. Nankin shahrida deyarli barcha aholi, ya’ni 8,7 million kishidan koronavirusga test olindi.
Mavzuga doir:
Izoh (0)