Oliy Majlis Qonunchilik palatasining 10-iyundagi yalpi majlisida deputatlar ekologiya, atrof-muhitni muhofaza qilish va iqlim o‘zgarishi vaziri Aziz Abduhakimovga “Qattiq maishiy chiqindilarni qayta ishlashning samarali va zamonaviy tizimini yaratish hamda chiqindi poligonlarini yopish va rekultivatsiya qilish borasida amalga oshirilayotgan ishlar to‘g‘risida” parlament so‘rovini yuborish masalasini ko‘rib chiqdi.
Majlisda qayd etilishicha, so‘nggi yillarda mamlakatda atrof-muhitni muhofaza qilishni ta’minlash, xususan, qattiq maishiy chiqindilarni to‘plash va qayta ishlashning samarali va zamonaviy tizimini yaratish hamda chiqindi poligonlarini yopish va rekultivatsiya qilish borasida ishlar amalga oshirilmoqda. Lekin bu borada muayyan ishlar amalga oshirilgan bo‘lsada, o‘z yechimini kutayotgan qator masalalar mavjud.
Jumladan, qattiq maishiy chiqindi poligonlarini yopish, rekultivatsiya qilish, ularni qayta yuklash stansiyalarini hamda chiqindilarni qayta ishlashni tashkil etish, xizmat ko‘rsatuvchi sanitar tozalash korxonalari tomonidan chiqindilarni toifalarga ajratgan holda to‘plashi uchun maxsus chiqindi paketlari bilan (QR-kodli) bepul ta’minlash, qayta ishlash yoki ekologik xavfsiz tarzda utilizatsiya qilishni yo‘lga qo‘ygan tadbirkorlarga “yashil subsidiyalar” ajratish tizimini joriy etish bo‘yicha dasturlarda belgilangan ayrim loyihalar ijrosi kechikmoqda.
Bundan tashqari, elektromobillar keng ommalashib borayotgani nuqtayi nazardan kelgusida, ularning akkumulatorlari yaroqlilik muddati tugagandan so‘ng yoki turli sabablarga ko‘ra ishdan chiqqanda saqlashni tashkil etish hamda utilizatsiya qilish masalallari kun tartibiga chiqmoqda.
Majlisda yuqoridagilardan kelib chiqib, qattiq maishiy chiqindilarni qayta ishlashning samarali va zamonaviy tizimini yaratish hamda chiqindi poligonlarini yopish va rekultivatsiya qilish borasida amalga oshirilayotgan ishlar yuzasidan asoslantirilgan tushuntirishlar berish haqida ekologiya, atrof-muhitni muhofaza qilish va iqlim o‘zgarishi vaziriga parlament so‘rovi yuborildi.
Ekologiya vazirligi rahbaridan gibrid avtomobillar uchun ekologik sertifikat talablarini tushuntirish so‘ralib Aziz Abduhakimovga senatorlik so‘rovi ham yuborilgandi. 28-maydagi yalpi majlisda vazirlikning senator so‘roviga javobida ayrim ma’lumotlar tushib qolgani, ularga aniqlik kiritilmagani aytildi. Ekologiya vazirligi va Bojxona qo‘mitasi mas’ullari hozirgi kunda gibrid avtomobillarni mamlakatga import qilishda ekologik sertifikat talab qilinmayotganini bildirdi. Buni aniq belgilab qo‘yish maqsadida Vazirlar Mahkamasi qarori loyihasi ishlab chiqilgan.
Izoh (0)