Tesla kompaniyasi Ostinda o‘zining haydovchisiz taksisini sinovdan o‘tkazish bosqichiga o‘tdi. Bu haqda Electrek nashri xabar bermoqda.
Ma’lum qilinishicha, kompaniya birinchi marta avtonom transport operatorlarining shahar reyestrida “sinovdan o‘tkazish” maqomi bilan ro‘yxatdan o‘tgan. Bir yil davomida avval kuzatuvchi haydovchilar bilan, keyin esa ularsiz sinov o‘tkazgan Waymodan farqli o‘laroq, Tesla sug‘urta haydovchilarsiz sinovlarni faqat may oyining oxirida boshladi.
Tesla’ning o‘z avtonom avtomobillar parkini boshqarishga o‘tishi strategiyaning o‘zgarishini anglatadi. Avvalroq kompaniya 2016 yildan buyon sotilgan Full Self-Driving (FSD) tizimiga ega millionlab avtomobillar haydovchining ishtirokisiz mustaqil harakatlana olishini va’da qilgandi. Endi esa Tesla Ostinning geomintaqaviy hududi uchun maxsus sozlangan va masofadan boshqaruv yordamida qo‘llab-quvvatlanadigan cheklangan mashinalar parkiga e’tibor qaratmoqda.
Tesla uzoq vaqt davomida o‘z avtomobillarini to‘liq haydovchisiz deb rasmiy tan olishdan qochib, ularni inson nazoratni saqlab qolishi kerak bo‘lgan haydovchiga yordam tizimi (ADAS) sifatida taqdim etdi. Bu avtonom transportni sinovdan o‘tkazish, shu jumladan hisobot berish va litsenziyalash bo‘yicha qat’iy talablarni chetlab o‘tish imkonini berdi.
Shunday bo‘lsa-da, so‘nggi oylarda shahar bo‘ylab haydovchisi old o‘rindiqda o‘tirgan va zavod raqamlari bo‘lgan Tesla avtomobillari muntazam ravishda ko‘zga tashlanib turdi. Bu esa yopiq sinovlar o‘tkazilganini tasdiqladi. Endi esa kompaniya shahardagi haydovchisiz transport operatorlari ro‘yxatida rasman paydo bo‘ldi, bu ochiq sinov bosqichiga o‘tganidan dalolat beradi.
Teslaning Ostindagi tijoriy ishga tushirilishi taqdiri sertifikatlashtirish jarayonlaridan o‘tish sur’ati va joriy sinovlar natijalariga bog‘liq bo‘ladi. Maskning bayonotlariga qaramay, muddatlar qayta ko‘rib chiqilishi mumkin.
Izoh (0)