Opra Uinfri, Ilon Mask va Jeff Bezosni ulkan boylikdan tashqari nima birlashtiradi? Ularning barchasi oila va biznesni qanday uyg‘unlashtirishni muhokama qiladigan, o‘z tajribalari, maslahatlari bilan o‘rtoqlashadigan va ziddiyatli g‘oyalarni aytishdan qo‘rqmaydigan ota-onalardir. Forbes Life to‘plamida taniqli biznesmenlar va millionerlarning ota-onalik haqidagi o‘nta iqtibosi keltirildi.
Bill Geyts, Microsoft asoschilaridan biri
“Mening farzandlarim ajoyib tarbiya va taʼlim olishdi, lekin men ularga boyligimning 1 foizidan kamrog‘ini qoldiraman, chunki bu ularga foyda keltirmaydi, deb qaror qildim. Bu sulola emas. Men ulardan Microsoftʼni boshqarishni so‘ramayman”.
Jeff Bezos, Amazon asoschisi
“Men tug‘ilganimda onam 17 yoshli maktab o‘quvchisi edi. Ishonchim komilki, 1964-yilda o‘rta maktabda o‘qiydigan qizning homilador bo‘lib qolishi unchalik zo‘r holat bo‘lmagan. Uni haydab yubormoqchi bo‘lishdi, lekin bobom onamning yonini oldi, u onam maktabga borishi kerakligini taʼkidladi. Bobom maktab direktori bilan gaplashdi va u onam maktabda qolishiga va o‘qishni tugatishiga ruxsat berdi. Onamga har qanday sinfdan tashqari mashg‘ulotlar bilan shug‘ullanish va hatto o‘z shkafiga ega bo‘lish ham taqiqlangan edi. Onam o‘rta maktabni men tug‘ilganimda tamomlagan. To‘rt yoshimdan buyon bobom meni har yili yozda o‘z ranchosiga olib borardi. 16 yoshimgacha deyarli har yozni u bilan birga o‘tkazdim. Onam va o‘gay otam menga pul emas, ishonch va umid berishgan. Bu boylikdan ko‘ra muhimroq edi”.
Ilon Mask, Tesla, SpaceX asoschisi
“Bola tarbiyasi — bu 18 yillik sanoat muhandisligi kabidir. Farzandlaringizga maktabda o‘rgatilayotgan narsalarga ehtiyot bo‘ling. Hozir o‘qish uchun universitet kerak emas: hamma narsa bepul. Menimcha, ular asosan ko‘ngil ochish va uy vazifalarini bajara olishingizni ko‘rsatish uchun yaratilgan. Internet tufayli xohlagan narsangizni bilib olishingiz mumkin. Diplomlar shunchaki oliy maʼlumotingiz borligini ko‘rsatadi, lekin bilimni emas”.
Uorren Baffet, investor va tadbirkor
“Menimcha, merosning hajmidan ko‘ra, ota-onalarning xatti-harakatlari tufayli ko‘proq bolalar buziladi. Farzandlaringiz dunyoni sizning so‘zlaringiz emas, harakatlaringiz orqali o‘rganishadi. Farzandlar tug‘ilganidan boshlab, tabiiyki, siz ularning ustozisiz. Bu juda muhim hamda jiddiy ish va o‘ylaymanki, boy odam bolalariga qoldiradigan pul miqdori hal qiluvchi omil bo‘lmaydi. Farzandlarning qanday o‘sishida muhit va ular atrofida ko‘radigan narsalar, shuningdek, ota-onalarining xatti-harakatlari katta rol o‘ynaydi”.
Aleksis Oganyan, Reddit hammuassisi
“Men hozirda o‘z karyerasining cho‘qqisida bo‘lgan tanishlarim o‘zlarining qanday ota ekanliklari haqida o‘z bizneslaridan ko‘ra ko‘proq qayg‘urishlarini aniqladim. Men yetti yil oldin ota bo‘lganman va bu ajoyib lahza edi, chunki ota-onalik darajasi mashhur erkaklar uchun juda past edi. Agar siz shunchaki farzandingiz borligini tan olgan bo‘lsangiz — bu allaqachon ajoyib deb hisoblangan. Ammo aslida, biz masʼuliyatni o‘z zimmasiga olgan va uning merosini tashkil etuvchilarning tarbiyasiga chinakam hissa qo‘shgan erkaklar haqida gapirishimiz kerak”.
Opra Uinfri, teleboshlovchi va media magnat
“Ota-ona bo‘lish — bu bolaligingda yoningda ko‘rishni istagan katta odam bo‘lish imkoniyatidir”.
Richard Brenson, Virgin Group korporatsiyasi asoschisi
“Men uyda ishlashni afzal ko‘raman. Bu ota-onalarga bola bilan ko‘proq vaqt o‘tkazish imkonini beradi. Bolalarim kichkinaligida men suzuvchi uyda yashardim va Virgin’ni ko‘tarardim, ular esa atrofimda to‘polon qilishardi. Bolamning tagligini almashtirib, keyin telefonda ish bo‘yicha gaplashardim. O‘ylashimcha, men oilam va bolalarim bilan boshqa har qanday otaga qaraganda ko‘proq birgaman. Axir umr poyonida eng muhimi — bu oilang va do‘stlaringdir”.
Sergey Koltovich, top-menejer, “TNK-BP Avia” sobiq rahbari
“Menimcha, bolalarga hamma narsani aytib berish, tushuntirish va tanlash imkoniyatini o‘zlariga berish kerak. Turli mashg‘ulotlarni sinab ko‘rishsin, o‘zlari uddalay oladigan va zavq bag‘ishlaydigan ishlarni qilishsin. Va oxir-oqibat o‘zlari tanlashadi. Ota-onaning oqilona vazifasi ham ana shunda”.
Mark Kyuban, tadbirkor
“Men sizga chek yozib bermayman. Siz cheksiz kredit kartasini olib, xohlagan narsangizni shunchaki sotib ololmaysiz. Sog‘lig‘ingizdan so‘ng, mening asosiy tashvishim sizning erka tantiq bo‘lib qolmasligingizdir”.
Stiven King, yozuvchi, millioner
“Hech kim hech qachon uzoq va baxtli yashamaydi, lekin biz bolalarimizga buni o‘zlari aniqlashlariga ruxsat berishimiz kerak”.
Izoh (0)