O‘yinchoqlar dunyosidagi ba’zi mini avtomobillar nafaqat avtosevuvchilarni, balki ularni yig‘ish bilan shug‘ullanuvchi insonlarni ham hayratda qoldiradi. Bunday hashamatli o‘yinchoqlarning narxi millionlab dollarlarni tashkil etadi va har biri o‘zining noyob dizayni bilan ajralib turadi. Ushbu maqolada dunyodagi eng qimmat o‘yinchoq avtoulovlar haqida so‘z boradi.
Aston Martin DB5 — 123 000 dollar
Jeyms Bond avtomobilining elektron mini versiyasi Britaniyaning Little Car kompaniyasi tomonidan ishlab chiqarilgan bo‘lib, u nafaqat haqiqiy avtomobilning replikasi sifatida taniqli, balki o‘zining josuslik jihozlariga egaligi bilan ajralib turadi. Masalan, faralar ichidan o‘yinchoq avtomatlar paydo bo‘ladi. Avtomobilda “tutun uzatuvchi” maxsus qurilmasi bo‘lib, u mashina trubalari orqali qora tutun chiqaradi va kinolardagidek effekt beradi. O‘yinchoq avtomobilga 21,5 ot kuchiga ega dvigatel o‘rnatilgan bo‘lib, uning narxi 123 000 dollarni tashkil etadi.
Bugatti Baby — 125 000 dollar
Mashhur avtomobilsoz va Bugatti avtomobil kompaniyasining asoschisi Ettore 500 ta bolalar avtomobilini ishlab chiqargan, ulardan birinchisini u o‘g‘li uchun o‘z qo‘llari bilan tayyorlagan. Hozirda faqat 100 ga yaqin ishlaydigan o‘yinchoq nusxalari mavjud. Ushbu elektr avtomobillarning narxi 2015-yilda 125 000 dollarni tashkil etgan.
Hot Wheels — 140 000 dollar
2008-yil fevralda Mattel kompaniyasi Hot Wheels seriyali avtomobillarning 40 yilligiga bag‘ishlab, 140 000 dollarlik o‘yinchoq mashinalar modelini chiqardi. Ushbu avtomobil 18 karat oq oltindan yasalgan bo‘lib, 2700 dona moviy, qora va oq olmoslar bilan bezatilgan. Signal berish qismi esa rubin toshlari bilan qoplangan.
Ferrari 330 P2 Junior — 145 445 dollar
Ushbu avtomobil 1990-yillarda fransuz kompaniyasi De La Chapelle tomonidan ishlab chiqarilgan, 2021-yil fevralida esa RM Sotheby’s kim oshdi savdosida 145 445 dollarga sotilgan. Uning dastlabki narxi 10 000 dollar bo‘lgan. Albatta, o‘yinchoqdan Ferrari kabi yuqori darajali sifat va tezlikni kutishning hojati yo‘q, shunga qaramay, uning narxi juda yuqoridir. P2 Honda gazon o‘ruvchi moslama uchun ishlab chiqarilgan besh ot kuchiga ega motor bilan harakatga keladi.
Pink-Rear Loading Volkswagen Beach Bomb 1969 — 175 000 dollar
Agar yuqorida keltirilgan modellarning narxini murakkab muhandislik yechimlari, yuqori sifat va qimmatbaho materiallar bilan izohlash mumkin bo‘lsa, mazkur mikroavtobusning narxi faqatgina uning yagona nusxada ekanligi uchun qimmatdir. Ba’zi mish-mishlarga ko‘ra, Volkswagen Beach Bomb’ning yana bir nusxasi saqlanib qolgan. Hozirda ushbu eksperimental model Bryus Paskalga tegishli mini avtomobillar kolleksiyasida — Hot Wheels nomli 7000 ta avtomobillar orasida saqlanmoqda.
Lamborghini Aventador — 6 000 000 dollar
Ushbu 1:8 o‘lchamdagi o‘yinchoq modelni germaniyalik dizayner Robert Gyulpen ishlab chiqqan. Bu original avtomobilning to‘liq nusxasi bo‘lib, ichki qismi ham, tashqi ko‘rinishi ham original mashinadek ishlangan. V12 dvigateli o‘rnatilgan avto o‘yinchoq g‘ildiraklari oltin va platina bilan qoplangan, o‘rindiqlar esa qimmatbaho toshlar bilan bezatilgan. Oldingi faralar shaffof olmoslardan, orqa faralar esa rangli qimmatbaho toshlar bilan qoplangan.
Lamborghini Aventador Gold — 7 500 000 dollar
Ushbu Lamborghini Aventador 1:8 masshtabli bo‘lib, model 7,5 million dollarga sotilgan va bu dunyodagi eng qimmat o‘yinchoq avtomobil hisoblanadi. Bu pulga 18 ta haqiqiy Aventador xarid qilish mumkin. Model avvalgi Robert Guelpen Engineering kompaniyasining Aventador mashinasi muvaffaqiyatidan ilhomlanib, to‘liq oltindan yasalgan. Uning faralari olmoslar, g‘ildiraklari platinadan ishlatilgan, ichki qismi esa qimmatbaho uglerod tolasi qo‘llangan.
Izoh (0)