Sog‘liqni saqlash vazirligi endi tez tibbiy yordam xizmatida elektromobillardan ham foydalanilishini ma’lum qildi.
Unga ko‘ra, Ipoteka bank OTP Group tomonidan Respublika tez tibbiy yordam markaziga 10 dona BYD Seagull rusumli zamonaviy elektromobillar taqdim etildi. Shu munosabat bilan o‘tkazilgan tadbirda Sog‘liqni saqlash vazirligi va bank rahbariyati, soha mas’ullari hamda ommaviy axborot vositalari vakillari ishtirok etdi.
Unda sog‘liqni saqlash vaziri o‘rinbosari so‘zga chiqib, bunday hamkorlik mamlakat aholisiga tez tibbiy xizmat ko‘rsatish sifati va samaradorligini yanada oshirishga xizmat qilishini ta’kidladi. Bugungi kunda mazkur moliya muassasasi tibbiyot tashkilotlari, ta’lim muassasalari, sug‘urta, axborot texnologiyalari va kommunikatsiyalari sohasidagi kompaniyalarga yaqindan ko‘mak beradi.
Taqdim etilgan ushbu elektromobillar Respublika tez tibbiy yordam markazining 10 ta hududiy filiali o‘rtasida taqsimlanib, tizimda tajriba tariqasida foydalaniladi hamda uning natijalari bo‘yicha zarur takliflar ishlab chiqiladi.
Ma’lumot o‘rnida, bugungi kunda tez tibbiy yordam tizimida 2 857 ta tibbiy brigada faoliyat yuritib, 3 100 dan ziyod avtotransport vositasi aholiga sifatli xizmat ko‘rsatmoqda. Mazkur avtomashinalarning 574 tasi esa B toifali reanimobillar hisoblanadi.
2024-yil fevral oyida 103 xizmatining hududiy filiallariga 30 dona Volkswagen Caddy avtomashinalari taqdim etilgandi. Shu yil 7-mart kuni 70 ta A toifali Volkswagen Caddy avtomashinalari topshirilgan.
Izoh (0)