25 yillikdagi eng yirik IPO: Porsche 75 milliard yevroga baholandi

Porsche Germaniyada yigirma yil ichidagi eng yirik IPO’ni o‘tkazdi. Kompaniya 9,4 milliard yevro yig‘di va 75 milliard yevroga baholandi. Bu haqda “Kommersant” xabar bermoqda.

Germaniyaning hashamatli avtomobillar ishlab chiqaruvchi Porsche kompaniyasi 28-sentabr, chorshanba kuni IPO o‘tkazdi.

Bu tarixdagi eng yirik Yevropa fond birjalaridan biri va Germaniyadagi so‘nggi 25 yildagi eng yirik IPO bo‘ldi.

IPO (Initial Public Offering) — bu kompaniya aksiyalarining fond birjasida birinchi joylashtirilishi.

Aksiya — bu korxona ishlab chiqaradigan qimmatbaho qog‘oz. Aksiyalarni sotib olgan aholi vakillari yoki kompaniyalar biznesga sherik bo‘lib qolishadi.

Kompaniya uchun IPO — bu manfaatli shartlarda yirik investitsiyalarni jalb qilish usuli.

Aksiyalarni joylashtirishda kompaniyalar 82,5 yevro ya’ni avval belgilangan narxning yuqori chegarasida savdo qildi. Shunday qilib, Porsche’ning umumiy qiymati 75 milliard yevroga baholandi. Kompaniya IPO davomida 9,4 milliard yevro yig‘di.

Bugun, 29-sentabrda Frankfurt fond birjasida savdoning ochilishida kompaniya aksiyalari 84 yevrogacha ko‘tarildi — ammo keyin ular 62 yevrogacha keskin tushib ketdi. So‘nggi paytlarda IPOdan keyingi aksiyalarning pasayishi odatiy holga aylandi.

IPO oldidan Porsche ustav kapitali ikkita teng qismga bo‘lingan: kompaniya kapitalining 50 foizi oddiy aksiyalarga, qolgan 50 foizi esa ovoz berish huquqisiz imtiyozli aksiyalarga aylandi.

IPO davomida investorlarga kompaniya imtiyozli aksiyalarining 25 foizi sotilgan. Taklifdan so‘ng Porsche’ning asosiy ulushi — oddiy aksiyalarning 25 foizi va 1 ta ulush hali ham Porsche va Piyech oilalariga tegishli. Volkswagen kompaniya aksiyalarining 12,5 foiziga egalik qiladi.

Oxirgi bir necha oy ichida aksariyat kompaniyalar, jumladan, boshqa hashamatli avtomobil ishlab chiqaruvchilari: Aston Martin, Ferrari, BMW, Mercedes-Benz aksiyalari pasaymoqda.

Dealogic tahliliy firmasining ma’lumotlariga ko‘ra, 2021-yilda AQSHdagi IPO bilan birjaga chiqqan kompaniyalarning 87 foizi hozirda IPO narxidan pastroq savdo qilmoqda.

Bunday sharoitda ko‘plab kompaniyalar birjada ro‘yxatga olishdan bosh tortmoqda — AQSHda IPOlar o‘n yildan ortiq vaqt ichidagi eng yomoni bo‘lishi kutilmoqda.

Porsche SE — Porsche va Piech oilalari tomonidan nazorat qilinadigan xolding kompaniyasi — alohida bayonotga ko‘ra, 7,9 milliard yevrogacha qarz mablag‘lari bilan oddiy aksiyalarni sotib olishni moliyalashtiradi.

Porsche va Volkswagen 2011-yilda birlashgan. O‘sha paytda Porsche Volkswagen sho‘ba korxonasi etib tayinlangan edi.

Volkswagen Porsche bosh kompaniyasi bo‘lishdan tashqari, Audi, Bugatti va Lamborghini avtomobil kompaniyalariga ham egalik qiladi.

Avvalroq Volkswagen Germaniya va Sharqiy Yevropada avtomobil ishlab chiqarishni to‘xtatishi kutilayotgani haqida xabar berilgandi.