Surxondaryodan topilgan ayiq bolasi zooparkka topshirildi

Surxondaryo viloyatidagi “Uzun” davlat o‘rmon xo‘jaligi hududidan 24-yanvar kuni ayiq bolasi topib olingandi. Ushbu jonivor 28-yanvar kuni Toshkent hayvonot bog‘iga olib kelindi.

Ma’lum bo‘lishicha, Tabiat resurslari vazirligi tomonidan ayiq bolasi veterinariya ko‘rigidan o‘tkazish va vaqtincha saqlab turish maqsadida Toshkent hayvonot bog‘i qoshidagi reabilitatsiya markaziga topshirilgan.

“Kichkintoyning vazni juda yengil. Ayiqlar odatda qishki uyquga ketishdan oldin sovuq havoda ularni himoya qilib, ko‘klamgacha yetib olishga imkon beruvchi qalin yog‘ qatlamini yig‘ishi lozim ekanini inobatga olsak, ayiqcha omon qolmasligi mumkin edi. Shuning uchun jonivorni bizning reabilitatsiya markazimizga o‘tkazish lozim deb topildi. Ayni chog‘da u mutaxassislarimiz nazorati ostida, ular ayiqchaga qulaylik yaratish uchun barcha imkoniyatlarni ishga solmoqda”, — deyiladi hayvonot bog‘i axborot xizmati xabarida.

Vazirlik hamda Toshkent hayvonot bog‘i mutaxassislari bahor fasli boshida ushbu ayiq bolasini  “Uzun” davlat o‘rmon xo‘jaligidagi tabiat bag‘riga qo‘yib yuborishni rejalashtirmoqda.