Ижтимоий тармоқларда Зомин миллий табиат боғида йўл бўйида айиқ юргани ҳақида видео тарқалди. Жиззах вилояти Экология, атроф-муҳитни муҳофаза қилиш ва иқлим ўзгариши бошқармаси ҳолат юзасидан маълумот берди.
Унга кўра, Зомин миллий табиат боғи назоратчилари томонидан ҳудудни тунда назорат қилиш чоғида йўл бўйида айиқ юрганининг гувоҳи бўлган ва бу ҳолат мобил тасвирга олинган. 14 май куни Миллий боғ матбуот хизмати томонидан бу тасвир ўз расмий каналига жойланган ва тармоқ фойдаланувчилари томонидан бу ҳолат нотўғри талқин этилиб тарқатилган.
“Зомин тоғлари бағридаги ушбу табиат маскани нафақат ўзининг ноёб флора ва фаунаси билан, балки уни асраб-авайлаётган инсонлар билан ҳам қадрли. Инспекторларнинг меҳнати кўпинча жамоатчилик нигоҳидан йироқда қолади, бироқ уларнинг ҳар кечаси — табиатга садоқат, она юртга меҳр-муҳаббат намунасидир”, дейилади бошқарма хабарида.
Бундан аввал Бўстонлиқ тумани Бурчмулла давлат ўрмон хўжалигига қарашли Ахсарсой ҳудудида қўнғир айиқ ўлдириб кетилгани ҳақида хабар берилганди. Шунингдек, Сурхондарёда яшайдиган, ўта ноёб тур бўлган, Халқаро ва Ўзбекистон Қизил китобига киритилган тарғил сиртлоннинг (дўлта) Шўрчи туманида ўлдирилгани ҳақида хабар берилган эди.
Изоҳ (0)