“Ekologuz” Telegram kanalida “Telegram’dagi kanallarda yovvoyi qushlarning savdosi avjida” nomli xabar eʼlon qilindi. Unda aytilishicha, “Ovchilar” Telegram kanalida Navoiy viloyati Qiziltepa tumanida yashovchi fuqaro qo‘lga o‘rgatilgan lochin qushini sotmoqchiligi to‘g‘risida e‘lon joylashtirgan.
“Qush 100 dollarga baholanmoqda. Tabiatga tegishli mulkni qanday sotish mumkin? Yana qanday tushuntirish kerak odamlarga? Ular ona tabiat bo‘lagi hisoblanadi. 4 oylik qush, albatta, qutqarib qolinadi, deb umid qilamiz”, — degan ekolog faollar.
“Daryo” muxbiri lochinni sotuvga qo‘ygan shaxs bilan telefon orqali bog‘landi, u haqiqatan ham lochin sotilayotganini tasdiqlagan.
Bu kabi holatlarda Ma’muriy javobgarlik to‘g‘risidagi kodeksning 92-moddasi 2-qismi bilan maʼmuriy bayonnoma rasmiylashtiriladi. Bunday huquqbuzarlik baʼzaviy hisoblash miqdorining 10 barobari — 3,3 million so‘m jarimaga sabab bo‘ladi.
Aprel oxirlarida Surxondaryoda xorijlik ovchi Qizil kitobga kiritilgan echkini ovlagani yuzasidan izoh berilgan, Qashqadaryoda esa Qizil kitobga kiritilgan ayiq otib o‘ldirilgani yuzasidan jinoyat ishi qo‘zg‘atilgan edi. Toshkentda Qizil kitobga kiritilgan qushlarning noqonuniy savdosiga chek qo‘yilgan, Farg‘onada bo‘ri bolalari necha puldan sotilgani maʼlum bo‘lgandi. Sirdaryoda Qizil kitobga kiritilgan sakkizta lochinni 280 mln so‘mga sotishga uringan shaxslar ushlangan.
Izoh (0)