Ekologiya, atrof-muhitni muhofaza qilish va iqlim o‘zgarishi vazirligi tasarrufidagi “Yuqori To‘palang” milliy tabiat bog‘ining “Zevar” bo‘limida o‘rnatilgan fotoqopqonlarga Tyan-Shan qo‘ng‘ir ayig‘i muhrlandi.
Qo‘ng‘ir ayiq Tabiatni muhofaza qilish xalqaro ittifoqi (IUCN) Qizil ro‘yxati va O‘zbekiston Qizil kitobiga zaif, keng, ammo mozaik tarzda tarqalgan kichik tur maqomida kiritilgan.
G‘arbiy Tyan-Shan va Pomir-Oloyda (respublika bo‘yicha Toshkent, Jizzax, Surxondaryo, Qashqadaryo va Samarqand viloyatlarida) uchraydi. 1970–1980-yillarda soni G‘arbiy Tyan-Shanda atigi 200-220 tani tashkil qilgan, ammo so‘nggi o‘n yilliklardagi tabiatni muhofaza qilish choralari tufayli qo‘ng‘ir ayiqlarning soni barqarorlashdi va respublika bo‘yicha 500 dan ortiqni tashkil etdi.
Fotoqopqonga muhrlangan noyob hayvonlar
2023-yilning sentyabr oxirlarida “Zomin” davlat qo‘riqxonasiga o‘rnatilgan fotoqopqonga “Archa maydon” hududida sayr qilib yurgan ona-bola Turkiston silovsini tushib qolgani ma’lum bo‘lgan edi. 2022-yilning oktyabr oyida “Surxon” davlat qo‘riqxonasiga o‘rnatilgan fotoqopqonga manul tushib qolgandi. Shuningdek, “Hisor” davlat qo‘riqxonasi qo‘riqlash xodimlari tomonidan o‘rnatilgan fotoqopqon obyektiviga Turkiston silovsini, “Chotqol” davlat biosfera qo‘riqxonasida esa qor qoploni muhrlangani to‘g‘risida xabar berilgandi.
Izoh (0)