Toshkent shahar Yakkasaroy tumanida noma’lum hayvon ko‘chada yurgani haqida xabarlar tarqaldi. Ekologiya boshqarmasi holat yuzasidan ma’lumot berdi.
Unda aytilishicha, ishonch telefonlari orqali qilingan murojaat asosida Toshkent shahar Ekologiya, atrof-muhitni muhofaza qilish va iqlim o‘zgarishi boshqarmasining Yakkasaroy tumani inspektorlari tomonidan joyiga chiqib o‘rganilganda notanish hayvon Qizil kitobga kiritilgan 1 dona qoraquloq ekani aniqlangan.
Holat bo‘yicha Toshkent hayvonot bog‘i mutaxassislari bilan hamkorlikda ushbu hayvonni tutish ishlari amalga oshirilib, hayvonot bog‘iga topshirildi.
Bundan avval Bo‘stonliq tumani Burchmulla davlat o‘rmon xo‘jaligiga qarashli Axsarsoy hududida qo‘ng‘ir ayiq o‘ldirib ketilgani haqida xabar berilgandi. Shuningdek, Surxondaryoda yashaydigan, o‘ta noyob tur bo‘lgan, Xalqaro va O‘zbekiston Qizil kitobiga kiritilgan targ‘il sirtlonning (do‘lta) Sho‘rchi tumanida o‘ldirilgani haqida xabar berilgan edi.
Izoh (0)