Toshkent viloyatining Parkent tumanidagi xususiy hayvonot bog‘ida qorovul uchta sher hujumidan halok bo‘lgani haqida xabar berilgandi. Holat yuzasidan sud ishi yakunlandi.
Hodisa 2024-yil 17-dekabr kuni soat, taxminan, tonggi 05:00 larda sodir bo‘lgan. 3 ta Afrika sheri qafasdan hayvonot bog‘i hududiga katak eshigi ochiq qoldirilganidan foydalanib chiqqan. So‘ng sherlar ularni katakka qaytarmoqchi bo‘lgan 1980-yilda tug‘ilgan qorovul F.I.ga hujum qilgan, qorovulni o‘ldirgan.
Mazkur holat hayvonot bog‘i xodimlari tomonidan soat 09:00 larda aniqlanib, 2 ta sher uxlatuvchi dori vositalari qo‘llangan holda katakka qaytarilgan. 1 ta sher esa mahalliy ovchi tomonidan otib o‘ldirilgan.
Ushbu voqea yuzasidan xususiy hayvonot bog‘i direktoriga nisbatan jinoyat ishi qo‘zg‘atilib, ehtiyot chorasi sifatida qamoqqa olingan edi. Sudlanuvchi Jinoyat kodeksining 257-moddasi ikkinchi qismining bandida nazarda tutilgan jinoyatni sodir etganlikda aybdor deb topildi va unga ushbu moddaga asosan uch yil muddatga ozodlikni cheklash jazosi tayinlandi. Qamoqqa olish ehtiyot chorasi bekor qilinib, u darhol sud zalida qamoqdan ozod qilindi.
O‘zbekiston hayvonot bog‘larida yirtqichlar qurboniga aylangan insonlar
Ovqat beraman deb ...
2023-yilning 3-yanvar kuni Xo‘jaobod tumanida joylashgan Andijon hayvonot bog‘i ishchisi ovqat berish maqsadida ayiqning qafasiga kirgan vaqtida yirtqich hamlasiga uchrab halok bo‘lgandi.
O‘shanda hayvonot bog‘i mas’ullari, voqea joyiga borgan “Daryo” muxbiriga aytishicha, fojia marhumning xavfsizlik qoidalariga amal qilmagani oqibatida ro‘y berganini ta’kidlashgan.
Hodisa qafasga o‘rnatilgan kuzatuv kamerasi tomonidan qayd etilgan bo‘lib, tasvirda chindan ham marhum xavfsizlik talablariga rioya qilmaganini ko‘rish mumkin.
Sher hamlasiga uchragan yana bir qorovul
2018-yil 30-dekabr kuni Andijon hayvonot bog‘i qorovuli qafasda saqlanayotgan Simba laqabli sherga ovqat berayotgan chog‘ida yirtqich uni tilkalab tashlagan. Oqibatda 45 yashar erkak hodisa joyiga vafot etgandi.
Sud-tibbiyot ekspertizasining dastlabki xulosasiga ko‘ra, marhumning o‘limiga bo‘yin va tananing boshqa sohalaridagi ko‘plab ochiq jarohatlar va o‘tkir qon tomir yetishmovchiligi sabab bo‘lgan. Fojia sherning och qolib ketishi oqibatida ro‘y bergani aytilmoqda.
Bosh prokuratura ham qorovul, ham hayvon boquvchi bo‘lib ishlagan marhum hayvonot bog‘ida boqilayotgan ikkita sher yoniga ular bilan o‘ynash maqsadida qafas ichiga kirganida yirtqichlar hujumiga uchragani keltiriladi. Xorijiy nashrlar esa fojia sherlarning och qolib ketgani oqibatida yuz bergani xususida yozgan.
Qochib ketgan yirtqichlar
2018-yili Samarqand tumanida “Durbek” ko‘chma hayvonot bog‘iga tegishli sherlar qafasidan chiqib ketadi. Ularni ushlashning iloji bo‘lmaganidan so‘ng so‘nggi chora sifatida otib o‘ldiriladi.
Baxtli tasodif tufayligina sherlar na ko‘chma hayvonot bog‘i xodimlariga va na aholiga zarar yetkazgan. Tezkorlik bilan qabul qilingan qaror tufayli ro‘y berishi ehtimoli yuqori bo‘lgan fojianing oldi olingan.
Natijasi noma’lum jinoyat ishlari
Andijondagi hayvonot bog‘ida ro‘y bergan bir emas, ikkita fojiadan keyin ham xuddi shunday jinoyat ishlari qo‘zg‘atilgandi. Biroq mas’ul idoralar tergov yakuni yuzasidan rasmiy axborot bermagan.
Jamoatchilik javobgarlarga nisbatan qanday chora ko‘rilgani, jabrlanuvchilarning oilasiga kompensatsiya to‘lab berilganmi yoki yo‘q, bu haqda hech qanday ma’lumotga ega emas.
Hayvonot bog‘lari kerakmi?
Bugungi kunda O‘zbekistonda yuqoridagi fojialar ro‘y bergan muassasalardan tashqari respublikamizning qariyb barcha hududida hayvonot bog‘lari mavjud. Xuddi Parkentdagi zoopark singari ularning ayrimlari xususiy, ayrimlari esa davlat tasarrufida.
Butun dunyodagi hayvonlar himoyasi bilan shug‘ullanuvchi faollar zooparklar faoliyatiga qarshi kurashib kelishadi. Ularning fikricha, bunday muassasalarda insonlar hayvonlarga nisbatan shafqatsiz munosabatda bo‘lishadi, shu sababli ham ularning faoliyatini to‘xtashish zarur.
O‘zbekistonda ham hayvonot bog‘larida saqlanayotgan hayvonlarga nisbatan o‘ta yomon munosabatda bo‘lingan holatlar kuzatilgan. Jumladan, Nukusdagi hayvonot bog‘ida ayiq suvsiz qoldirilib tahqirlangan, Navoiydagi hayvonot bog‘ida uzoq vaqt davomida yomon sharoitda saqlangan hayvonlar poytaxtga olib kelingan, Farg‘ona hayvonot bog‘idagi jirafa anomal sovuqda shamollab qolgani ortidan nobud bo‘lgan edi.
Biroq mazkur hodisalarning barchasi xususiy zooparklarda yuz bergan. Shu sababli ham ekofaollar O‘zbekiston sharoitida xususiy hayvonot bog‘lariga ehtiyoj borligini so‘roq ostiga olishadi.
Izoh (0)