Fransuz fermeri o‘z yeridan oltin topdi, ammo boylikdan foydalana olmadi. Ushbu mamlakat qonunchiligiga ko‘ra, tabiiy boyliklar xususiy mulkda joylashgan bo‘lsa ham davlat mulki hisoblanadi. Bu haqda UnionRayo nashri xabar bermoqda.
Ma’lum qilinishicha, 52 yoshli Mishel Dyuponning yer uchastkasi Overn viloyatida joylashgan. Uning aytishicha, hududni ko‘zdan kechirayotganda, balchiqda g‘alati yaltirashni payqagan. U biroz chuqurroq kovlaganda oltin bo‘laklarini topgan.
Dastlabki baholashlarga ko‘ra, yer ostida 150 tonnadan ortiq oltin mavjud bo‘lishi mumkin. Bunday miqdor hatto tajribali geologlarni ham hayratga soldi. Zaxiralarning taxminiy qiymati 4 milliard yevroni tashkil etadi.
Biroq huquqiy va ekologik ekspertiza o‘tkazilmaguncha foydali qazilmalarni qazib olish taqiqlangan. Hozirda hudud har qanday tijorat faoliyati uchun yopiq. Mishelning o‘zi ehtiyotkor bo‘lish kerakligini tushunishini, ammo “umidsizlikka tushmaslik qiyin”ligini ta’kidladi.
Mahalliy aholining munosabati turlicha bo‘ldi. Ba’zilar oltin koni mintaqaga iqtisodiy rivojlanish uchun imkoniyat yaratishi mumkin, deb hisoblaydi. Boshqalar esa foydali qazilmalarni qazib olishning atrof-muhitga va mintaqaning osoyishta hayotiga ta’siridan xavotirda ekanligini bildirmoqda.
Izoh (0)