Fransiya hukumati Telegram messenjeri asoschisi Pavel Durovning “investitsiya fondlari bilan muzokaralar o‘tkazish” uchun AQSHga borish haqidagi so‘rovini rad etdi. Bu haqda Politico xabar bermoqda.
Ma’lum qilinishicha, Parij prokuraturasi 12-may kuni uning so‘rovini “chet elga bunday safar zaruriy yoki asosli emas”, degan vaj bilan rad etgan.
Durov 2024-yil 24-avgust kuni Parijning Le Burje aeroportida Telegram orqali sodir etilgan noqonuniy harakatlarda ishtirok etganlikda gumonlanib qo‘lga olingan. 28-avgust kuni tadbirkor sud nazoratiga olinib, unga 5 million yevro miqdorida garov puli to‘lash majburiyati yuklangan.
Sud qarorga asosan Durovga Fransiyadan chiqish taqiqlangan bo‘lib, agar xorijiy mamlakatlarga safar qilishi lozim bo‘lsa, ruxsat so‘rashi lozim. U shu kunga qadar 2025-yilning 15-martidan 7 aprelgacha Dubayga borish uchun bunday ruxsat olgan.
Ma’lumotlarga ko‘ra, Durov Rossiyada tug‘ilgan bo‘lsa-da, Fransiya va BAA fuqarosi hisoblanadi.
Durov hibsga olinganidan beri Fransiya hukumatini tanqid qilib kelmoqda. Yaqinda u Ruminiyada prezidentlik saylovlari ikkinchi bosqichi arafasida Fransiya razvedkasi rahbari Nikolas Lerner undan Telegram orqali konservativ ovozlarni to‘sishni so‘raganini aytdi. Fransiya hukumati esa Durovning bu da’volarini qat’iy rad etdi.
Izoh (0)