Fransiya giyohvand moddalar savdosi bilan shug‘ullanuvchilar va radikallarni joylashtirish uchun Fransiya Gvianasi hududida xavfsizligi kuchaytirilgan qamoqxona quradi. Bu haqda mamlakat Adliya vazirligiga tayanib BBC xabar berdi.
Mamlakat adliya vaziri Jerald Darmaninning ta’kidlashicha, qamoqxona giyohvand moddalar bilan shug‘ullanuvchi ashaddiy jinoyatchilarga boshpana bo‘ladi.
2028-yilda ochilishi rejalashtirilayotgan 400 million yevrolik inshoot Sent-Loran-du-Maroni shimoli-g‘arbiy mintaqasidagi Amazonka o‘rmonlarining ichkarisida izolyatsiya qilingan hududda quriladi. Unda 500 nafargacha odam saqlanishi ko‘zda tutilgan. Eng xavfli jinoyatchilar esa alohida bo‘lmalarda saqlanadi.
Fransiya hukumati uzoq vaqtdan beri qamoqxonalarga mobil telefonlarning kirib borishi ustidan nazoratni yo‘qotgan edi. Hozirda fransuz qamoqxonalarida o‘n minglab uyali aloqa vositalari borligi ma’lum qilingan. 2025-yil boshida Fransiya hukumati jinoiy to‘dalar faoliyatiga chek qo‘yish uchun mo‘ljallangan yangi qonunni e’lon qilgan.
Saint-Laurent-du-Maroni mashhur Iblis oroli koloniyasining sobiq kirish porti bo‘lib, u yerga 1852—1954-yillarda Fransiya qit’asidan 70 ming mahkum jo‘natilgan.
Izoh (0)