O‘zbekistonda eski liftlarni yangilash uchun 850 mlrd so‘mdan ziyod mablag‘ ajratiladi, deb xabar bermoqda Qurilish va uy-joy kommunal xo‘jaligi vazirligi.
Qayd etilishicha, O‘zbekistonda ko‘p kvartirali uy-joylardagi lift uskunalarining texnik holatini yaxshilash va aholiga xavfsiz sharoit yaratish maqsadida chora-tadbirlar amalga oshirilmoqda.
“Xavfsiz lift” yagona idoralararo platformasi doirasida liftlarga xizmat ko‘rsatuvchi tashkilotlarning reyestri yuritiladi. Ushbu reyestrga tashkilotlarning liftlarni o‘rnatish va ta’mirlash faoliyati uchun berilgan ruxsatnomalar, ularning amal qilish muddati hamda xizmat ko‘rsatuvchi mutaxassislar to‘g‘risidagi ma’lumotlar kiritilishi belgilangan.
Kelgusida mazkur platforma orqali respublikadagi ko‘p qavatli uy-joylardagi barcha lift uskunalarini real vaqt rejimida kuzatib borish imkoniyati yaratiladi.
Vazirlar Mahkamasining tegishli qaroriga muvofiq, mamlakatdagi 5491 ta ko‘p kvartirali uyda joylashgan 13 798 ta lift uskunasi to‘liq xatlovdan o‘tkazildi. Xatlov natijasiga ko‘ra, foydalanish muddati o‘tgan 2001 ta liftni yangilash va 382 tasini ta’mirlash zarurligi aniqlandi.
Mazkur maqsadlarni amalga oshirish uchun mahalliy byudjet mablag‘lari hisobidan jami 854,6 milliard so‘m ajratilishi belgilandi. Ushbu chora-tadbirlar lift uskunalarining uzluksiz va xavfsiz ishlashini ta’minlash, avariyaviy holatlarning oldini olish, zamonaviy dispetcherlik xizmatini joriy etish va aholining hayot sifati hamda xavfsizligini oshirishga xizmat qiladi.
Toshkent shahar hokimining “Toshkent shahrida iqtisodiyot tarmoqlari, ijtimoiy va energetika soha obyektlari hamda ko‘p qavatli uy-joy fondini 2025/2026-yillar kuz-qish davrida barqaror ishlashga tayyorlash chora-tadbirlari to‘g‘risida”gi qarori qabul qilindi. Qarorda Toshkentda 2025-yil oxirigacha 452 ta lift yangilanishi belgilandi.
Ko‘p qavatli uylarning liftlarini boshqarish va monitoring qilish bo‘yicha “Xavfsiz lift” yagona idoralararo platformasi ishlab chiqilayotgani haqida xabar berilgandi.
Izoh (0)