O‘zbekiston Uy-joy kommunal xizmat ko‘rsatish vazirligi mamlakat bo‘ylab ko‘p qavatli uylarda liftlarni ta’mirlash va yangilash ishlarini bosh pudratchi sifatida Texnopark korxonasiga topshirishni taklif qildi. Lekin hukumat qaroriga ko‘ra, ijrochilar tender va tanlovlar asosida tanlanishi lozim ekanligi ta’kidlangan. Monopoliyaga qarshi kurashish qo‘mitasi holat yuzasidan o‘z xulosasini berdi.
Hukumat qarori bilan Uy-joy kommunal xizmat ko‘rsatish vazirligi va Axborot texnologiyalari vazirligi 2020-yil 1-dekabrga qadar liftlarning texnik holatini nazorat qilish va favqulodda vaziyatlarni tezkor ro‘yxatdan o‘tkazish uchun raqamli platforma loyihasini ishlab chiqishi va uni amalga oshirishi kerak edi. Ushbu muddatni Texnopark kompaniyasini ijrochilar ro‘yxatiga qo‘shish bilan bir qatorda 2021-yil 1-apreligacha uzaytirish taklif etilmoqda.
Qo‘mita xulosasida Texnoparkka yuqoridagi vazifalarni topshirish “Raqobat to‘g‘risidagi” qonunga va prezidentning 2017-yil 8-sentyabrdagi farmoniga zid ekanligi aytilgan. Xususan, bu bilan alohida xo‘jalik yurituvchi subyektlarga asossiz ravishda eksklyuziv huquqlar, individual imtiyozlar va preferensiyalar berish bilan bog‘liq bo‘lgan punktlar buzilmoqda.
Hukumat qaroriga binoan 2021−2027-yillarda mamlakatda 3562 ta liftni ta’mirlash va almashtirish (84 ta — ta’mirlash, 3478 ta — almashtirish) va bunga 665 milliard so‘m sarflash rejalashtirilgan.
Mavzuga doir:
- O‘zbekistondagi Coca-Cola zavodi arzon narxlangani shubha keltirib chiqardi. Aksilmonopoliya qo‘mitasi bunga munosabat bildirdi
- “Ayrim avtomobil ishlab chiqaruvchilarga berilgan imtiyozlar va eksklyuziv huquqlarni qisqartirishimiz kerak” — MQKQ rahbari
- Deputat Alisher Qodirov Monopoliyaga qarshi kurashish qo‘mitasini UzAuto Motors’ning obro‘siga putur yetkazishda aybladi
Izoh (0)