Samarqandning ko‘p qavatli uylaridagi 227 ta liftning 65 tasi ishlamayapti

Samarqand shahridagi 77 ta ko‘p qavatli uyda 227 ta lift mavjud. Ularning aksariyatida uzoq yillardan beri lift ishlamaydi, deb yozadi “Zarnews.uz”. Liftlarning nosoz holga kelib qolganiga 20 yildan oshdi. Bu vaqt davomida deyarli har yili liftlar ta’mirlanadi va yana buzilaveradi. Bugungi kunga kelib esa ana shu liftlarning barchasi yangilanishi shart bo‘lib qoldi.

Shu yilning 17—18-mart kunlari davlat rahbari viloyatga tashrif buyurganida bu masala ham tilga olinib, 2019—2020-yillarda mavjud liftlarning barchasi yangilanishi lozimligi belgilab berildi.

— Liftlarni ta’mirlashga ozmuncha pul ajratmadik, – deydi “Ilg‘or kelajak sari” uy-joy mulkdorlari shirkati raisi Vohid Nazarov. – Misol uchun, “Uy-joy ta’mir” korxonasiga har bir lift ta’miri uchun o‘rtacha 23 million so‘mdan pul berdik. Ammo ko‘p o‘tmay buzilib qolmoqda.

– Hozirgi kunda bir dona zamonaviy liftning narxi 160 million so‘mgacha, – deydi viloyat uy-joy, kommunal xo‘jalik boshqarmasi bo‘lim boshlig‘i Shuhrat Nurbekov. – Garchi viloyatdagi mavjud liftlarning barchasi ham ma’nan, ham moddiy tomondan eskirib ketgan bo‘lsa-da, shu vaqtgacha e’tiborsiz qolib kelgan. Endi bu soha eng dolzarb masalalardan biriga aylandi. Shu yilning o‘zida ishlamay turgan 65 ta lift ta’mirlanadi. Kelgusi yildan boshlab liftlar yangisiga almashtiriladi.

Uy-joy mulkdorlari shirkati xodimi Shavkat Ahmedovning so‘zlariga ko‘ra, aslida me’yor bo‘yicha liftlar 220 volt kuchlanishli elektr tokida ishlashi kerak. Ammo necha yilki, bunday kuchlanishning o‘zi yo‘q, 120—160 kuchlanish mavjud, xolos.

– Joylarda elektr energiyasidan foydalanish hajmining o‘sishi yoxud tarmoqlarning eskirishi va boshqa sabablar bilan elektr kuchlanishi kamayishi mumkin, – deydi “Samarqand elektr tarmoqlari” AJ direktorining texnik ishlar bo‘yicha o‘rinbosari Elyor Mamasoliyev. – Xodimlarimiz bu bo‘yicha o‘rganish o‘tkazib, yangilash lozim bo‘lgan obyektlarni taqdim etishadi va shu asosda yangilanadi. Ammo yuqoridagi holat bo‘yicha na fuqarolardan va na tegishli tashkilotlardan biror murojaat kelgan emas.