Shavkat Mirziyoyev Toshkent shahrida amalga oshiriladigan qurilish va ijtimoiy loyihalar bilan tanishdi

21-fevral, juma kuni, Shavkat Mirziyoyev 2020-yil Toshkent shahrida amalga oshiriladigan qurilish va ijtimoiy loyihalar bilan tanishdi. Bu haqda Prezident matbuot xizmati xabar qilgan.

Xabarga ko‘ra, 2020-yilda Toshkentda keng ko‘lamli bunyodkorlik loyihalari amalga oshirilishi rejalashtirilgan. Xususan, Bektemir tumanining “Majnuntol”, “Bektemir”, “Oltin topgan”, “Binokor” mahallalari, Husayn Boyqaro, Ziroat ko‘chalari bo‘ylab umumiy uzunligi qariyb 18 ming pogon metr yangi ichimlik suvi quvurlari o‘rnatilishi mo‘ljallangan. Buning natijasida 6,8 mingdan ortiq aholi markazlashgan ichimlik suvi bilan ta’minlanadi, poytaxt bo‘ylab markazlashgan ichimlik suvi bilan ta’minlanganlik darajasi 100 foizga yetkaziladi.

Toshkent shahridagi “Bo‘zsuv” va “Salar” suv tozalash inshootlarining quvvatini sutkasiga 200 ming metr kubga oshirish rejalashtirilgan.

Prezidentning Uchtepa tumaniga tashrifi davomida bergan topshirig‘iga muvofiq, 697 ta liftni yangilash ko‘zda tutilgan. Yiliga 700 tadan lift yangilansa, yaqin 5 yilda poytaxtdagi muddatini o‘tab bo‘lgan liftlarning barchasini almashtirishga erishiladi.

2020-yilda Bektemir, Olmazor, Shayxontohur, Yashnobod tumanlarida yangi maktabgacha ta’lim muassasalari qurish ko‘zda tutilgan. Shuningdek, Bektemir va Yashnobod tumanlarida maktab, Sergeli tumanida ko‘p tarmoqli shifoxona, Chilonzor va Yashnobod tumanlarida oilaviy poliklinika, Sergeli va Olmazor tumanlarida yangi madaniyat markazlari qurilishi belgilangan. Umumiy hisobda 1,047 ming kvadrat metr yo‘l ta’mirlanadi.

Shavkat Mirziyoyevga ana shu loyihalar haqida batafsil ma’lumot berildi. Prezident loyihalarning samaradorligi va ijtimoiy ahamiyatiga alohida e’tibor qaratib, ularning belgilangan muddatlarda amalga oshirilishini ta’minlash bo‘yicha ko‘rsatmalar berdi, deyilgan xabarda.

19—20-fevral kunlari Shavkat Mirziyoyev Turkiya Respublikasi rahbari Rajab Toyyib Erdo‘g‘onning taklifiga binoan ushbu mamlakatga tashrif buyurgan. Davlat rahbarlari dastlab tor doirada muzokara o‘tkazgan. Prezidentlar raisligida Oliy darajadagi strategik hamkorlik kengashining birinchi yig‘ilishi bo‘lib o‘tgandi. Strategik hamkorlik kengashining birinchi yig‘ilishi natijalari to‘g‘risida qo‘shma bayonot, shuningdek, iqtisodiyot, savdo, texnologiyalar sohasiga oid hujjatlar imzolangan. Tashrifning ikkinchi kunida davlat rahbari Turkiyaning yetakchi kompaniya va banklari rahbarlari bilan uchrashuv o‘tkazgan. Turkiya prezidenti huzuridagi Xalq kutubxonasining ochilish marosimida ishtirok etib ushbu maskan bilan yaqindan tanishgandi.