Qatar va AQSH o‘rtasida shartnoma imzolandi. Unga ko‘ra amirlik AQSHdan 42 milliard dollarlik qurol-yarog‘ va texnika xarid qiladi. Bu haqda AQSH prezidenti Donald Tramp ma’lum qildi.
“Kecha biz Qatar bilan 42 milliard dollarlik eng zamonaviy Amerika harbiy texnikasini sotib olish bo‘yicha kelishuv imzoladik. Bu texnikalar qatoriga THAAD raketaga qarshi batareyalari, Pegasus yoqilg‘i quyish samolyotlari, Desert Vipers yengil zirhli mashinalari, amfibiya jangovar mashinalari, MQ-9B va Sky Guardian uchuvchisiz uchish apparatlari kiradi”, dedi AQSH prezidenti Qatardagi Al-Udayd aviabazasida amerikalik harbiylar oldida so‘zlagan nutqi davomida.
Shuningdek, AQSH prezidenti Amerikaning Al-Udeyd harbiy bazasini kengaytirishga 10 milliard dollar mablag‘ sarflash rejasi borligini ma’lum qildi.
“Qatar ham kelgusi yillarda ushbu ulkan bazani rivojlantirishga 10 milliard dollar sarmoya kiritishini ma’lum qildi”, deb qo‘shimcha qildi Tramp.
Chorshanba kuni Tramp Fors ko‘rfazi arab mamlakatlariga safari doirasida Qatarga davlat tashrifi bilan bordi. U so‘nggi 20 yildan ortiq vaqt ichida amirlikka tashrif buyurgan birinchi AQSH prezidenti bo‘ldi. Amerika rahbarining Qatar amiri shayx Tamim bin Hamad Ol Soniy bilan muzokaralari yakunida Qatar milliy aviakompaniyasi Amerikaning Boeing kompaniyasidan samolyotlar xarid qilish bo‘yicha kelishuvga erishdi.
Shuningdek, Vashington va Doha bir qator mudofaa kelishuvlarini imzoladi va xavfsizlik sohasidagi hamkorlikni mustahkamlashga kelishib oldi.
AQSH prezidenti Donald Tramp Yaqin Sharqqa rasmiy safarining ikkinchi kunida Qatar amiri shayx Tamim bin Hamad Ol Soniy bilan 1,2 trillion dollarlik iqtisodiy bitim imzolagani xabar qilingandi.
Izoh (0)