AP: AQSH Ukrainaga 275 mln dollarlik yangi harbiy yordam taqdim etadi

AQSH Ukrainaga 275 million dollarlik yangi harbiy yordam paketini taqdim etadi, deb xabar bermoqda Associated Press manbalarga tayanib.

Agentlik yozishicha, yangi paketda yangi qurollar yo‘q, yordam asosan avval berilgan qurol tizimlarini o‘q-dorilar bilan ta’minlashga qaratilgan bo‘ladi. Xususan, gap Ukraina qarshi hujumda foydalanayotgan HIMARS yoppasiga o‘t ochuvchi reaktiv tizimlari haqida bormoqda.

Qurollar Pentagonning zaxiralardagi qurollarni kamaytirish dasturiga muvofiq yuborilayotgan bo‘lishi mumkin.

Yangi yordam paketi haqida rasman 28-oktabrda e’lon qilinishi kutilmoqda. Ushbu yordamni ham qo‘shib hisoblaganda, 24-fevraldan beri AQSHning Ukrainaga harbiy yordami hajmi qariyb 18 milliard dollarga yetadi.

26-oktabr kuni AQSH Ukrainaga birinchi NASAMS zenit-raketa komplekslarini topshirgani ma’lum bo‘lgan edi.

NASAMS — o‘rta masofaga mo‘ljallangan havo mudofaa tizimi. U “havo-havo” raketasini olib yuradi. Kompleks mavjud va yaqinlashayotgan dushman samolyotlari, dronlari va qanotli raketa tahdidlarini aniqlash, urish va yo‘q qilish qobiliyatini maksimal darajada oshiradi.

NASAMS’dan 12 ta davlat, jumladan AQSH, Norvegiya, Finlyandiya, Ispaniya, Niderlandiya, Ummon, Litva, Indoneziya, Avstraliya, Qatar, Vengriya va nomi oshkor etilmagan yana bir davlat foydalanadi.