Россия ва Хитой бошқа давлатларга мурожаат қилиб, Корея Халқ Демократик Республикасига нисбатан куч ишлатиш орқали босим ўтказишдан воз кечишга чақирди. Бу ҳақда Кремль сайтида эълон қилинган Ғалабанинг 80 йиллигини нишонлаш муносабати билан ҳамкорликни янада чуқурлаштириш тўғрисидаги икки давлатнинг қўшма баёнотида маълум қилинган.
Таъкидланишича, Россия ва Хитой “тегишли давлатлар”ни бир томонлама санкциялар ва куч ишлатиш орқали босим ўтказишдан, шунингдек, Шимоли-Шарқий Осиёни ҳарбийлаштириш ва у ерда қарама-қаршиликни келтириб чиқариш сиёсатидан воз кечишга чақирмоқда. Бунинг ўрнига Корея ярим оролидаги кескинликни юмшатиш чораларини кўришга ундамоқда.
“Томонлар Корея яриморолидаги муаммоларни ҳал қилишнинг мажбурий шарти суверенитетни ўзаро ҳурмат қилиш ва жалб қилинган давлатларнинг миллий манфаатларини мувозанатли ҳисобга олиш эканлигига ишонч билдирмоқда”, дейилади баёнотда.
Шунингдек, Россия ва Хитой яриморолдаги муаммоларни ҳал қилиш ва Шимоли-Шарқий Осиёда узоқ муддатли тинчлик ва барқарорликка эришишга ҳисса қўшишга тайёрлигини билдирди.
Россия биринчи марта КХДРнинг Курск вилояти учун бўлган жанглардаги иштирокини расман тан олган эди. Президент Владимир Путин Шимолий Корея жангчиларига миннатдорчилик билдириб, уларнинг ҳаракатлари халқаро ҳуқуққа тўлиқ мувофиқ бўлганини, шунингдек, 2024 йил июнь ойида имзоланган Кенг қамровли стратегик шериклик тўғрисидаги шартномага мос келганини таъкидлаганди.
Изоҳ (0)