Shou-biznes olami yulduzlarining jozibali ko‘rinishi va hayot tarzi odamlarni chalg‘itishi mumkin — go‘yo ularning hayotida hech qanday tashvishga o‘rin yo‘qdek. Ammo ekran ortida chinakamiga insoniy muammolar va fojialar yashiringan bo‘ladi. Doimiy bosim, muvaffaqiyat cho‘qqisiga bo‘lgan yo‘lda talablar, yo‘qotishlar, yolg‘izlik — bularning bari kasallik kabi odamning ich-etini yemiradi. Quyida nafaqat ruhiy muammolarga duch kelgan balki ularga qarshi kurashish yo‘llarini topishga muvaffaq bo‘lgan mashhurlar haqida hikoya qilamiz.
Adel — ajrimdan keyingi psixologik terapiya orqali najot topgan xonanda
Zamonaviy estradaning eng taniqli xonandalaridan biri Adel, biznesmen Saymon Konetski bilan ajrashgach, og‘ir ruhiy holatni boshidan kechirdi. Ular sakkiz yil birga yashagan va o‘g‘li Anjeloni tarbiyalab kelgan. Garchi ular shov-shuvlarsiz, tinchgina ajrashishgan va mulkni deyarli teng taqsimlashgan bo‘lishsa ham, 2019-yildagi ajrim Adel uchun haqiqiy zarba bo‘lgan.
Opra Uinfriga bergan intervyusida Adel ajrimdan so‘ng vahima xurujlari va kuchli bezovtalikni boshidan kechirgani haqida so‘zlab bergan:
“O‘zimni yo‘qotib qo‘ygandek his qilar edim, go‘yo hayot kemam boshqaruvchisiz oqim bo‘ylab suzayotgandek”, degan edi u.
So‘ng Adel doimiy ravishda psixoterapevtga qatnay boshlagan va davolanish unga nafaqat hissiy zo‘riqishlarni yengishga, balki o‘zini yaxshiroq tushunishga yordam bergan:
“Terapiya — bu zaiflik belgisi emas, aksincha, o‘ziga g‘amxo‘rlik qilishning bir turidir” degan Adel.
Selena Gomes — depressiya, jiddiy kasallik va vaziyatni qabul qilish yo‘lidagi mashaqqatlarni boshidan kechirgan
Selena Gomes bolaligidan san’atga yaqin o‘sgan. Avval u Disney kanalida, keyin esa musiqa sohasida o‘z tajribasini oshirdi. Atigi 16 yoshida u mashhurlikning salbiy tomonlari — tashqi ko‘rinishga nisbatan bosim, tig‘iz grafika asosida ishlash va atrofdagilarning haddan tashqari e’tibori bilan to‘qnash keldi. U ilk bor depressiya va xavotir alomatlarini 2013-yilda seza boshlagan, 20 yoshida esa bu haqda ommaga ochiq gapira olgan.
Keyinchalik unga bipolyar buzilish tashxisi qo‘yildi — bu holat vahima xurujlari, hissiy jihatdan zaiflik va doimiy xavotir hissi bilan kechadi. Bir kuni Selena bunday yashashda davom etish noto‘g‘ri ekanligini anglagan va ruhiy salomatligiga atroflicha e’tibor qaratishga qaror qilgan. U klinikada davolanish kursini o‘tkazdi, meditatsiya, yoga bilan shug‘ullana boshladi va turmush tarzini o‘zgartirdi.
“Faqat tanaga emas, ruhiyatga ham g‘amxo‘rlik qilish kerakligini angladim”, degan edi xonanda.
Bundan buyon ruhiy salomatlik Selenaning hayotida ustuvor o‘rin egalladi.
Kianu Rivz — yo‘qotishlarni qabul qila olishni o‘rgandi
Saxiy, oddiy va kamtarinligi bilan mashhur bo‘lgan aktyor Kianu Rivz stress va hissiy charchoq bilan o‘ziga xos tarzda kurashishni o‘rgangan. Uning hayotida bir nechta og‘ir voqealar yuz bergan: 1993-yilda yaqin do‘sti River Feniks vafot etdi, 1999-yilda esa yangi tug‘ilgan qizi olamdan o‘tdi. Oradan bir yarim yil o‘tib, uning sevgilisi Jennifer Saym avtohalokatda halok bo‘ldi.
Bu voqealar aktyor ruhiyatida chuqur iz qoldirdi. U ko‘p marotaba yolg‘izlik hissini boshidan kechirgan. So‘ng Kianu ichki iztiroblar bilan kurashishning o‘ziga mos yo‘lini topgan:
“Menga sukunat yoqadi. U menga tiklanish va ichki muvozanatni topishda yordam beradi”, deydi aktyor.
Uning motosikllarga va uzoq safarlarga bo‘lgan muhabbati o‘ziga xos meditatsiyaga aylangan. Aktyor ko‘pincha yolg‘iz sayohat qiladi, yo‘l davomida esa hayot mazmuni haqida mulohaza yuritib boradi.
Shahzoda Garri — doimiy xavotir, boks va qirollikdan qochish
Qirollik oilasida yashash bu nafaqat imtiyozlar, balki qat’iy cheklovlar, matbuotning doimiy e’tibori va jamiyat bosimida bo‘lish demakdir. Shahzoda Garri har bir qadami an’analarga bo‘ysundirilgan, har bir so‘zi OAVda muhokama qilinadigan muhitda ulg‘aygan. U hissiyotlarini ochiq ifoda eta olmasdi, qayerda yashash yoki qanday yashashni o‘zi tanlay olmasdi. Matbuotdagi doimiy tanqidlar, oilaviy va ijtimoiy bosim ichki ziddiyatni yanada kuchaytirgan. O‘zining qaysar fe’l-atvori bilan tanilgan Garri uzoq vaqt davomida xavotir va vahima xurujlaridan aziyat chekkan:
“O‘zimni oltin qafasdagidek his qilardim, hech ham erkin nafas ololmasdim”, degan edi u intervyusida.
Avvaliga u psixologik terapiyaga ishonmagan, ammo oxir-oqibat mutaxassislardan yordam so‘rashga qaror qilgan. Qirollik majburiyatlaridan voz kechib, AQSHga ko‘chib o‘tishi esa oilasini himoya qilish va erkinlikni his qilish uchun qo‘yilgan ilk qadam bo‘lgan.
Shundan so‘ng Garri sport bilan shug‘ullana boshladi, ayniqsa boksga bo‘lgan qiziqishi kuchaydi. Sport unga stress va salbiy hissiyotlardan qutulishga yordam bergan.
Ledi Gaga — Posttravmatik stress, og‘riqlar va art-terapiya
Ledi Gaga o‘zining yorqin obrazlari va hit qo‘shiqlari bilan mashhur. Ammo bu pardalar ortida posttravmatik stress, depressiya va surunkali og‘riq bilan kurashayotgan inson yashiringan. U o‘smirlik chog‘ida jinsiy zo‘ravonlik qurboni bo‘lgan va bu haqda yillar o‘tib ochiq gapirgan. Keyinchalik esa unga doimiy og‘riq va charchoqqa sabab bo‘ladigan fibromialgiya tashxisi qo‘yilgan.
Gaga bir necha bor ruhiy tushkunlikka tushganini, umuman yashashga qiziqishi yo‘qolganini tan olgan. Uni qutqargan narsa esa ijod bo‘lgan. Musiqa, raqs, dizayn va moda — bularning barchasi uning uchun art-terapiya bo‘lgan:
“Men ijod qilayotganimda, ichimdagi og‘riqdan xalos bo‘laman”, deydi xonanda.
Bundan tashqari, Gaga “Born This Way Foundation” jamg‘armasiga asos solgan. Tashkilot yoshlarning ruhiy holatini yaxshilashga hamda bullingga qarshi kurashishga yordam beradi.
Izoh (0)