Шоу-бизнес олами юлдузларининг жозибали кўриниши ва ҳаёт тарзи одамларни чалғитиши мумкин — гўё уларнинг ҳаётида ҳеч қандай ташвишга ўрин йўқдек. Аммо экран ортида чинакамига инсоний муаммолар ва фожиалар яширинган бўлади. Доимий босим, муваффақият чўққисига бўлган йўлда талаблар, йўқотишлар, ёлғизлик — буларнинг бари касаллик каби одамнинг ич-этини емиради. Қуйида нафақат руҳий муаммоларга дуч келган балки уларга қарши курашиш йўлларини топишга муваффақ бўлган машҳурлар ҳақида ҳикоя қиламиз.
Адел — ажримдан кейинги психологик терапия орқали нажот топган хонанда
Замонавий эстраданинг энг таниқли хонандаларидан бири Адел, бизнесмен Саймон Конецки билан ажрашгач, оғир руҳий ҳолатни бошидан кечирди. Улар саккиз йил бирга яшаган ва ўғли Анжелони тарбиялаб келган. Гарчи улар шов-шувларсиз, тинчгина ажрашишган ва мулкни деярли тенг тақсимлашган бўлишса ҳам, 2019 йилдаги ажрим Адел учун ҳақиқий зарба бўлган.
Опра Уинфрига берган интервьюсида Адел ажримдан сўнг ваҳима хуружлари ва кучли безовталикни бошидан кечиргани ҳақида сўзлаб берган:
“Ўзимни йўқотиб қўйгандек ҳис қилар эдим, гўё ҳаёт кемам бошқарувчисиз оқим бўйлаб сузаётгандек”, деган эди у.
Сўнг Адел доимий равишда психотерапевтга қатнай бошлаган ва даволаниш унга нафақат ҳиссий зўриқишларни енгишга, балки ўзини яхшироқ тушунишга ёрдам берган:
“Терапия — бу заифлик белгиси эмас, аксинча, ўзига ғамхўрлик қилишнинг бир туридир” деган Адел.
Селена Гомес — депрессия, жиддий касаллик ва вазиятни қабул қилиш йўлидаги машаққатларни бошидан кечирган
Селена Гомес болалигидан санъатга яқин ўсган. Аввал у Дисней каналида, кейин эса мусиқа соҳасида ўз тажрибасини оширди. Атиги 16 ёшида у машҳурликнинг салбий томонлари — ташқи кўринишга нисбатан босим, тиғиз графика асосида ишлаш ва атрофдагиларнинг ҳаддан ташқари эътибори билан тўқнаш келди. У илк бор депрессия ва хавотир аломатларини 2013 йилда сеза бошлаган, 20 ёшида эса бу ҳақда оммага очиқ гапира олган.
Кейинчалик унга биполяр бузилиш ташхиси қўйилди — бу ҳолат ваҳима хуружлари, ҳиссий жиҳатдан заифлик ва доимий хавотир ҳисси билан кечади. Бир куни Селена бундай яшашда давом этиш нотўғри эканлигини англаган ва руҳий саломатлигига атрофлича эътибор қаратишга қарор қилган. У клиникада даволаниш курсини ўтказди, медитация, ёга билан шуғуллана бошлади ва турмуш тарзини ўзгартирди.
“Фақат танага эмас, руҳиятга ҳам ғамхўрлик қилиш кераклигини англадим”, деган эди хонанда.
Бундан буён руҳий саломатлик Селенанинг ҳаётида устувор ўрин эгаллади.
Киану Ривз — йўқотишларни қабул қила олишни ўрганди
Сахий, оддий ва камтаринлиги билан машҳур бўлган актёр Киану Ривз стресс ва ҳиссий чарчоқ билан ўзига хос тарзда курашишни ўрганган. Унинг ҳаётида бир нечта оғир воқеалар юз берган: 1993 йилда яқин дўсти Ривер Феникс вафот этди, 1999 йилда эса янги туғилган қизи оламдан ўтди. Орадан бир ярим йил ўтиб, унинг севгилиси Женнифер Сайм автоҳалокатда ҳалок бўлди.
Бу воқеалар актёр руҳиятида чуқур из қолдирди. У кўп маротаба ёлғизлик ҳиссини бошидан кечирган. Сўнг Киану ички изтироблар билан курашишнинг ўзига мос йўлини топган:
“Менга сукунат ёқади. У менга тикланиш ва ички мувозанатни топишда ёрдам беради”, дейди актёр.
Унинг мотоциклларга ва узоқ сафарларга бўлган муҳаббати ўзига хос медитацияга айланган. Актёр кўпинча ёлғиз саёҳат қилади, йўл давомида эса ҳаёт мазмуни ҳақида мулоҳаза юритиб боради.
Шаҳзода Гарри — доимий хавотир, бокс ва қиролликдан қочиш
Қироллик оиласида яшаш бу нафақат имтиёзлар, балки қатъий чекловлар, матбуотнинг доимий эътибори ва жамият босимида бўлиш демакдир. Шаҳзода Гарри ҳар бир қадами анъаналарга бўйсундирилган, ҳар бир сўзи ОАВда муҳокама қилинадиган муҳитда улғайган. У ҳиссиётларини очиқ ифода эта олмасди, қаерда яшаш ёки қандай яшашни ўзи танлай олмасди. Матбуотдаги доимий танқидлар, оилавий ва ижтимоий босим ички зиддиятни янада кучайтирган. Ўзининг қайсар феъл-атвори билан танилган Гарри узоқ вақт давомида хавотир ва ваҳима хуружларидан азият чеккан:
“Ўзимни олтин қафасдагидек ҳис қилардим, ҳеч ҳам эркин нафас ололмасдим”, деган эди у интервьюсида.
Аввалига у психологик терапияга ишонмаган, аммо охир-оқибат мутахассислардан ёрдам сўрашга қарор қилган. Қироллик мажбуриятларидан воз кечиб, АҚШга кўчиб ўтиши эса оиласини ҳимоя қилиш ва эркинликни ҳис қилиш учун қўйилган илк қадам бўлган.
Шундан сўнг Гарри спорт билан шуғуллана бошлади, айниқса боксга бўлган қизиқиши кучайди. Спорт унга стресс ва салбий ҳиссиётлардан қутулишга ёрдам берган.
Леди Гага — Посттравматик стресс, оғриқлар ва арт-терапия
Леди Гага ўзининг ёрқин образлари ва ҳит қўшиқлари билан машҳур. Аммо бу пардалар ортида посттравматик стресс, депрессия ва сурункали оғриқ билан курашаётган инсон яширинган. У ўсмирлик чоғида жинсий зўравонлик қурбони бўлган ва бу ҳақда йиллар ўтиб очиқ гапирган. Кейинчалик эса унга доимий оғриқ ва чарчоққа сабаб бўладиган фибромиалгия ташхиси қўйилган.
Гага бир неча бор руҳий тушкунликка тушганини, умуман яшашга қизиқиши йўқолганини тан олган. Уни қутқарган нарса эса ижод бўлган. Мусиқа, рақс, дизайн ва мода — буларнинг барчаси унинг учун арт-терапия бўлган:
“Мен ижод қилаётганимда, ичимдаги оғриқдан халос бўламан”, дейди хонанда.
Бундан ташқари, Гага “Born This Way Foundation” жамғармасига асос солган. Ташкилот ёшларнинг руҳий ҳолатини яхшилашга ҳамда буллингга қарши курашишга ёрдам беради.
Изоҳ (0)