UESCA sertifikati (United States Sports Coaching Association)ga ega yugurish bo‘yicha trener Jeyms Rojers ozish uchun kuniga 10 ming qadam yurish yetarli bo‘ladimi, degan savolga javob berdi.
“Doimiy harakatda bo‘lish intensiv, ammo har kun takrorlanmaydigan mashqlardan muhimroqdir. Uzoq masofaga yurish va yugurishning foydasi faqatgina izchil davom ettirilgandagina sezila boshlaydi”.
Ba’zilar ortiqcha vazndan xalos bo‘lish uchun birdan kuchli va ma’lum intervalga ega mashg‘ulotlarni bajarsa, tezda bundan zerikishi va natija ko‘rmagani bois sportni tashlab qo‘yishi mumkin. Uzoq yurish esa og‘ir mashqlardan osonroq va uning davomiyligini ta’minlash osonroq. Bu omil ozish va salomatlik saqlash uchun eng oson va qulay usuldir”, dedi trener.
Jama Internal Medicine tadqiqotlariga ko‘ra, kuniga 10 ming va undan ko‘p qadam yurish saraton va yurak-qon tomir kasalliklari xavfini kamaytiradi.
Amerikaning Nature jurnalida 41 yoshdan 67 yoshgacha bo‘lgan 6042 kishi ishtirok etgan tadqiqotning so‘nggi natijalari e’lon qilindi. Tajriba o‘rtacha 4 yil davom etdi (2,2 dan 5,6 yilgacha). Unda barcha ishtirokchilarning jismoniy faolligi fitnes-trekerlar yordamida nazorat qilindi.
Natijalar shuni ko‘rsatdiki, qandli diabet, gipertoniya, depressiya, uyqudagi apnoe va gastroezofagial reflyuks kasalliklari va bosilgan qadamlar soni o‘rtasida bog‘liqlik mavjud.
“Fikrimcha, kuniga 10 ming qadam yurish barcha uchun birdek mos kelmasligi mumkin. Jismonan faollikni boshqa og‘irroq mashqlar bilan ham muvozanatda saqlash va turli xil mashg‘ulotlarni sinab ko‘rish orqali o‘zingizga mos rejimni izlab topish mumkin. Sog‘lom ovqatlanish tarziga rioya qilishni qo‘shish orqali ozishda sezilarli natijalarga erishiladi”, deya yakunladi Jeyms Rojers.
Izoh (0)