Ertalabki taomga oqilona yondashish orqali kun davomida bardam va tetik yura olish imkonimiz oshadi. To‘g‘ri tanlangan nonushta uyquchanlik va apatiyani yo‘q qiladi, sog‘liq va kayfiyatni yaxshilab, vaznni bir xil saqlashga va kun davomida ishtahaning kamayishiga yordam beradi. Ammo bugungi kunda nonushta qilmay ishga otlanadiganlar soni ortib bormoqda.
Xitoylik olimlar ertalab soat to‘qqizdan keyin nonushta qilgan odamlarda depressiya alomatlari 28 foizga ko‘proq uchrashini aniqladi. Ilmiy tadqiqot natijalari The Journal of Affective Disorders (JAD) nashrida chop etildi.
Sian Tzyaotun universitetining birinchi klinik kasalxonasi tadqiqotchilari 11 yil davomida 24 mingga yaqin o‘rta va katta yoshli insonlarning ovqatlanish odatlarini tahlil qildi va nonushta qilish vaqti ularning sog‘lig‘ida qanday o‘zgarishlarga olib kelishini kuzatdi. Ular ishtirokchilarning ertalab muntazam ravishda nonushta qilishganmi yoki yo‘qmi, shuningdek, kunning birinchi taomi soat nechada qilingani kabi ma’lumotlarni to‘pladi.
Tadqiqot natijalariga ko‘ra, ertalab soat to‘qqizdan keyin nonushta qilgan erkaklar va ayollarda soat sakkizdan avval ovqatlanganlarga qaraganda ko‘proq yomon kayfiyat va ruhiy salomatlik bilan bog‘liq muammolar kuzatilgan. Kech nonushta qiladiganlarning uchdan ikki qismida depressiyaga moyillik holatlari qayd etilgan. Bundan tashqari, nonushtani butunlay o‘tkazib yuborish psixologik va ruhiy salomatlikka birdek zarar ko‘rsatishi aniqlangan.
Olimlarning xulosasiga ko‘ra, kech nonushta qilish yoki uni umuman o‘tkazib yuborish uyqusizlik, jismoniy faollikning pasayishi va hattoki yashashga bo‘lgan ishtiyoqning kamayishiga olib kelishi mumkin.
Izoh (0)