Xonanda Dildora Niyozova “Daryo”ga bergan intervyusida ko‘plab muhokamalarga sabab bo‘lgan shaxsiy hayoti va turmush o‘rtog‘ining xiyonatini kechirgani haqida gapirdi.
— Oilamdagi nizolardan so‘ng xalqning yonida ham ko‘rinishni istamay qoldim. Oradan ancha vaqt o‘tdi, ko‘p haqiqatlarni tushunib yetdim. Turmush o‘rtog‘imning xiyonatini kechirdim, ko‘nglimda unga ham va u ayolga ham hech qanday yomonligim yo‘q. Haligacha odamlar orasiga kirib borsam, “Siz shunchalik mashhur ayol bo‘lib turib turmush o‘rtog‘ingizni kechirib yashayapsizmi?” deyishadi. “Nima qilibdi, Yaratgan shuncha gunohlarimizni kechiradi-ku”, deyman. Bu hayotda ko‘p ayollarni ko‘rdim. Bitta xiyonatga uchrasa, qasd olmagunga qadar tinchishmaydi. Ammo bu bilan inson o‘zini ham, atrofdagilarni ham qiynaydi. Inson kechirolsa, yashasin, agar unday qilolmasa, yaxshisi, u insondan voz kechgani maʼqul.
Bu voqealardan keyin juda ko‘p ayollar ijtimoiy tarmoqlardan aloqaga chiqib, mendan maslahat so‘rashdi. Shunda bildimki, oramizda bunday insonlar ko‘p. Ammo bu muammo emas, hech bir anduhni dilda saqlamay, shunchaki chiqarib yuborish kerak.
Agar hozirgi aqlim avvalroq kirganida, men ijtimoiy tarmoqlar orqali chiqish qilmasdim. Ayolligimga bordim va emotsiyaga berilib turli gaplarni gapirib yubordim. Bu uchun turmush o‘rtog‘imdan ham ko‘p marta uzr so‘radim. Har bir inson sevishni va sevilishni xohlaydi. Unga buyruq berib bo‘lmaydi, deydi Dildora Niyozova.
Xonanda maʼmurlik vazifasini turmush o‘rtog‘i bajarmayotgani va u eski kasbiga qaytgani haqida gapirdi.
— Turmush o‘rtog‘imga suyanib qolgan ekanman. Keyinchalik tushundimki, ayol faqatgina Yaratganga suyanishi va o‘z imkoniyatlariga qarab harakat qilishi kerak ekan. Muxlislarim turmush o‘rtog‘imga nisbatan biroz adolatsizlik qilishdi. Alfons degan gaplar uning ko‘ngliga og‘ir botdi. Nazarimda, ayolining ortidan kun ko‘radigan erkaklar boshqacha bo‘ladi, turmush o‘rtog‘im undaylar toifasiga kirmaydi. Bunday gap-so‘zlardan keyin u eski ishiga qaytishga qaror qildi. Hozir u Andijonda tibbiyot klinikasining qurilishida ishlayapti. Yaqinda borib ko‘rib keldim, ustalar qanday ahvolda ishlashsa va yashashsa, u ham xuddi shunday mehnat qilyapti. Yaxshi sharoitdan keyin bu ahvolda ishlolmaydi, deb o‘ylagandim. Ammo u inson sevimli ishi bilan shug‘ullanyapti. Uzoqda bo‘lsa-da, farzandlari haqida qayg‘uryapti.
Yashirmayman, avvallari turmush o‘rtog‘imga ishonib mashina ham boshqarmasdim. Ro‘zg‘or, ijoddagi tashkiliy ishlar ham mening zimmamda emasdi. Yolg‘izlik insonni pishitar ekan, hammasiga asta-sekin o‘rganyapman. Yolg‘iz ayollarga Allohdan kuch-quvvat tilayman, deydi Dildora Niyozova.
Suhbatni to‘liq holda “Daryo”ning YouTube kanalida tomosha qiling.
Izoh (0)