Shou-biznes olamida sevgi har doim ham haqiqiy his-tuyg‘ularni anglatmaydi. Ba’zida bu PR hiylalari hamda yuqori reytinglarni saqlab qolishning bir yo‘li bo‘ladi. Yulduzlar soxta juftini to‘satdan uchratib qolib, muxlislar orasida keng muhokama qilinadi va shu tariqa mashhurlik ko‘rsatkichi yanada oshadi. Quyida piar uchun munosabat o‘rnatgan mashhur insonlar haqida so‘z boradi.
Shon Mendes va Kamila Kapello
Ularning munosabati xuddi romantik filmdek boshlandi — pinhona uchrashuvlar, birgalikda ijod qilish va nihoyat rishtalarni ochiqlash… Lekin muxlislar bu juftlikni ijobiy qabul qilmadi va rishtalar haqiqiy ekanligiga avvalboshidan shubhalandi.
Ehtimol bu tasodifdir, ammo 2019-yilning 21-iyunida Shon va Kamila birgalikda “Senorita” qo‘shig‘ini taqdim etgach, tarona hitga aylandi. So‘ng 5-iyulga kelib, ularning munosabatlari haqida ilk mish-mishlar tarqaldi. Juftlik hatto paparatsilardan yashirinmas edi. Rishtalar soxta ekanligi haqidagi izohlar esa o‘sha zahoti ijtimoiy tarmoqlardan o‘chirib yuborilar edi.
Haqqoniy yoki soxta bo‘lishiga qaramay, ikki qo‘shiqchining sevgisi ikki yil davom etdi. Ularning ajrashishiga juda tig‘iz ish jadvali sabab bo‘ldi, deya izohlashdi.
Kim Kardashyan va Pit Devidson
2021-yilning noyabrida insayderlar Kimning yosh komik san’atkor Pit Devidson bilan munosabatda ekanligini tasdiqladilar. Bu ma’lumotni hech kim jiddiy qabul qilmagan edi, chunki Pitning avvalgi munosabatlari ro‘yxati juda uzun edi. Kim esa o‘sha paytda Kanye Uest bilan ajrim jarayonini boshidan o‘tkazayotgan edi.
Juftlikni birgalikda Kaliforniyadagi ko‘ngilochar bog‘larda, restoranlarda va tungi klublarda ko‘rishgan. Kimning bu munosabatlarini yana bir realiti-shou boshlash uchun oldindan tayyorgarlik, degan gumonlar ham bor edi. Kanye esa ularning munosabatini soxta deb atagan edi.
Ikki mashhur 9 oy birga bo‘lishdi. Pit hatto Kardashyanga atab tatuirovka ham chizdirdi. 2022-yilning avgustida esa juftlik ajrashdi. Keyinroq Kim bu munosabatdan juda afsusda ekanini bildirgan.
Irina Sheyk va Krishtianu Ronaldu
Irina Sheyk va Krishtianu Ronaldu 2009-yilda tanishgan. Ularning tanishuviga birinchi bo‘lib modellik agentligi orqali Irina Sheykni Ronaldu bilan tanishtirishga urinish sabab bo‘lgan.
Bu juftlikni kuzatganlar ko‘pincha ularning munosabatlarining reklama yoki PR strategiyasi bo‘lishi mumkinligi haqida fikrlar bildirishgan. Chunki Ronaldu va Sheyk o‘z munosabatlarini doimo jamoat oldida ko‘z-ko‘z qilgan, ularning birgalikdagi fotosuratlari tez-tez ommaviy axborot vositalarida chiqib turgan. Bundan tashqari, Ronalduning futbolga bo‘lgan shaxsiy imiji va Sheykning modellik karyerasi uchun bunday “ideal” juftlik obrazini yaratish foydali bo‘lishi mumkin edi.
Ikki mashhur o‘rtasidagi munosabatlar 2015-yilgacha davom etdi. Ularning ajrashishining aniq sabablari oshkor qilinmagan, ammo turli mish-mishlarga ko'ra, bu Ronalduning Irina Sheykni “Oltin to‘p” marosimiga olib kelmasligi va boshqa ayollar bilan munosabatlari tufayli yuzaga kelgan. Irina Sheyk ajrashishdan so'ng, ideal erkak sifatida vafodor va to‘g‘riso‘z insonni istashini bildirgan. Shuningdek, ajrashishdan keyin u sezilarli darajada vazn orttirgani haqida xabarlar tarqalgan. Bugungi kunda, har ikkisi ham o'z professional faoliyatlarini davom ettirmoqda va shaxsiy hayotlarini ommaviy e'tibordan chetda saqlashga harakat qilmoqdalar.
Teylor Svift va Tom Xiddlston
2016-yilda qo‘shiqchi va aktyorning munosabati ko‘plab muhokamalarga sabab bo‘lgan edi. O‘sha paytda Teylor DJ Kelvin Xarris bilan ajrashib, darhol Tom bilan gaplasha boshlagan edi. Barcha muxlislar buni faqat piar maqsadida uyushtirilganiga ishondi, ammo Tom va Teylorning munosabatlari shiddat bilan rivojlana boshladi, aktyor hatto Sviftning ota-onasi bilan yaqindan tanishib oldi.
U: “Men kelajakdagi bolalarimning onasini uchratdim”, deb aytgan edi.
So‘ng tez orada turmush qurish haqidagi mish-mishlar ham tarqaldi. Lekin munosabatlar qanday tez boshlangan bo‘lsa, shunday shiddat bilan o‘chdi: ular olti oy ichida ajrashdi. Teylor esa bunga shunday izoh berdi:
“Tom mening mashhurligimdan foydalanyapti, u munosabatlarimizni jamoatchilikka taqdim etayotganda doim o‘zimni noqulay his qilganman”, dedi xonanda.
Dua Lipa va Jek Harlou
2022-yil oxirida Dua Lipaning Jek Harlou bilan yangi munosabati haqida mish-mishlar paydo bo‘ldi. May oyida reper unga atalgan qo‘shiq chiqargan edi. O‘sha kuni Jek xonandaga video orqali qo‘ng‘iroq qilgan va yangi qo‘shiqni birinchi bo‘lib Duaning shaxsan o‘zi eshitib ko‘rishini taklif qilgan.
Noyabrda ikki qo‘shiqchi Los Anjelesda uchrashishgani kadrlarga tushib qolgan, keyinroq ularni paparatssilar tez-tez birgalikda ko‘rgan. Ammo ularning munosabatlari juda qisqa davom etdi. Ammo Harlou yozgan qo‘shiq shu tariqa tezda xitga aylandi.
Izoh (0)