“Qalpoq”dagi Alfiya kampir obrazi bilan tomoshabinlarga yaxshi tanish aktrisa Barno Teshaboyeva 14-aprel sanasida tug‘ilgan kunini nishonlamoqda. Aktrisa Toshkent viloyatining Chinoz tumanidagi Olmazor qishlog‘ida tug‘ilgan. Teshaboyevlar oilasida to‘rt qiz va to‘rt o‘g‘il o‘sib-ulg‘aygan. U oilada oltinchi farzand. Birgina film sabab aktrisa bo‘lishni maqsad qilgan va oliygohga kirolmaganini barchadan yashirgan, Alfiya kampir obrazi bilan tanilgan aktrisaning hayot yo‘li qanday kechgan?
“San’atga qiziqishim maktabimda chiqmasimdan avval boshlangan”
— Otam erta vafot etgan, biz kichik yoshda edik. Men maktabda o‘qirdim, oilada sakkizta farzand bo‘lganmiz. Onamning ismi Teshaboyeva Salima, 80 yoshda vafot etdilar. Uddaburon, mehnatkash ayol edi. Bir o‘zlari hammamizni oyoqqa turg‘azdi, o‘qitdi. Oilada hammamiz o‘qimishli, ilmli bo‘ldik.
Menikidek qiziq va beg‘ubor bolalik hech kimda bo‘lmagan bo‘lsa kerak deb o‘ylayman. Bola paytimizda qo‘shni bolalar bilan sen kelin bo‘lasan, sen kuyov bo‘lasan deb o‘yin o‘ynardik. Boshqa bola kuyov men bo‘lay desa, yo‘q sen xunuksan, mana bu bola kuyov bo‘ladi deb tanlardim. Bo‘lmasa, o‘zim ham ularning yoshidagi bola edim. Ssenariylar tuzib, san’atga qiziqishim o‘sha vaqtdan boshlangan.
Maktabga borganimdan so‘ng uy ishlarini qilishni uncha yoqtirmasdim. Qo‘y-sigirlarimiz bo‘lardi, shu sigirlarni dalaga olib chiqib, boqib kelish men uchun zo‘r edi. Uydagi qozon-tovoqni yuvish, osh-ovqat qilish men uchunmas edi.
4-sinfgacha dadam rahmatli ishdan qaytadigan vaqtda ko‘chaning boshiga chiqib olardim. Uzoqdan ko‘rinishlari bilan yugurib borib, yelkasiga minib olardim. 150-200 metr bo‘lsa ham uyimizgacha ko‘tarib olib kelardilar. Aka-ukalarim “Tarozining bir pallasida yettita farzand turardi, boshqa pallasida sen o‘zing turarding. Dadam rahmatli seni boshqacha yaxshi ko‘rar edilar” deyishadi.
“Cho‘kib, bir o‘limdan qolganman”
— Har uch oyda buvimnikiga mehmonga borardik. Uylarining yonida katta anhor o‘tgandi. Yozgi ta’tilda shu suvda cho‘milardik. Menga doim balon bilangina suvga tushishga ruxsat berishardi. Bir kuni tush payti hamma uxlab yotgandi. Ha, sizlarsiz maza qilib cho‘milaman deb sekin suv bo‘yiga bordim. Balonni kiyib, suvga tushdim-u, balon belimdan chiqib ketdi. Cho‘ka boshladim, yordam beringlar deb baqirganim sari og‘zimga suv kirib ketaverdi. Cho‘kyapman-u, soniyalar ichida xayolimdan faqat bir narsa o‘tdi — o‘lib qolsam onam yig‘laydi! Hali kichkinaman, lekin shu xayol tinmay aylanaverdi. Shu payt belimga bir narsa urildi. Suv bo‘yida o‘sadigan olcha daraxti ekan, sinib tushgandi. Shunga jon-jahdim bilan tirmashib, chiqib oldim. Qarasam, balonim ham yonimga kelib qolgan ekan. Og‘iz-burnimga anchagina suv kirgandi, yo‘talib-yo‘talib, qayt qilib olib, keyin uyga qaytib borganman va hech nima bo‘lmagandek qolganlarning yoniga yotib uxlaganman. Bu voqeani opalarimga ham, buvimga ham, onamga ham aytmagandim. Bir o‘limdan qolganman, deydi aktrisa.
“Birgina film sabab san’atni sevib qolganman”
Televizorda “Komila” degan film namoyish etilgan. Shunda qora ko‘zli, yuzlari dumaloq, yoshi ham o‘sha vaqtda men tengi qizcha rol o‘ynagan. Pianinochi rolini shu qadar qoyilmaqom ijro etganki, sehrlanib qolganman. Televideniyeda “Kino, kino, kino” degan ko‘rsatuv bo‘lardi. Toshkent – 11, Navoiy ko‘chasi – 69 manziliga deb tinimsiz xat yozganman. Har hafta maktub yozardim. “Men Navoiy viloyatining falon joyida yashayman, yoshim buncha, aktrisa bo‘lishni xohlayman. Iltimos, Rixsivoy Muhammadjonov, kelib meni kinoga olib keting”. Bir xil xat yozaverardim va ko‘rsatuv efirga uzatiladigan vaqtda muk tushib, hech bir sonini qoldirmay tomosha qilardim. Lekin hech xatimni o‘qishmasdi. Bir kun o‘yinga berilib, ko‘chaga chiqib ketganimda uzatilgan efirda mening maktubimni, ism-sharifimni o‘qishgan. Qo‘shnim televizorda ko‘rib qolib, “Voy, hozir televizorda Barnoni gapirishdi, sizlarning manzilingizni aytishdi” deb onamning yoniga yugurib chiqqan.
“Hatto texnikumga kirolmaysan, deyishgan”
— Maktabni tamomlayotganimda sinf rahbarimiz hammaga o‘zini iqtidoriga qarab, sen tibbiyot texnikumiga, sen quruvchilikka topshir deb maslahat bergan. Menga kelganda esa “Bu turishingda texnikumning yoniga ham yaqinlasholmaysan. Yaxshisi, 3 oylik, 6 oylik kotibalik kurslarida o‘qib ol, hayotda xor bo‘lmaysan” degan. Borib sochiga yopishgim kelib tursa ham indamay qo‘yaqolganman. San’at oliygohiga imtihon topshirib kirolmadim, lekin qishloqdoshlarimga kirolmaganimni aytish uyat edi. Ha, kirdim, o‘qiyapman derdim-u, har kuni aktyorlik mahorati darsiga borardim. Kelasi yil esa o‘qishga kirib ketganman, deydi aktrisa.
Alfiya kampir rolining yaratilish tarixi
— 1989-yili institutdagi ustozlarimiz tomonidan o‘ziga xos rol yaratish borasida topshiriq bo‘lgan. Qaysi rolni sahnaga olib chiqsam ekan, deb rosa bosh qotirganman. Shunda mahallamizdagi tatar kampir yodimga tushib, uni kuzata boshladim. Kiyinishi, gapirishi, xatti-harakatlari... Xullas, “Qalpoq”dagi ijodkorlar bilan institutda birga o‘qiganmiz. Ular Alfiya kampir obrazini bilgach, meni ham “Qalpoq”qa taklif etishgan. Alfiya kampir juda mashhur bo‘lib ketdi, hatto o‘z ismim qolib uning nomi bilan chaqiradigan ham bo‘lishdi. Shundan keyin bu obraz institutda mashhur bo‘lgan. Hamma “Alfiya kampir, Alfiya kampir” deb yurardi. Oxirgi paytda Barno ekanligim esimdan chiqib ketgan. Kimdir Alfiya desa, meni chaqiryapti, deb qaraydigan bo‘lganman.
O‘zim asli o‘zbekman. Mahallamizda tatar kampirlar bo‘lardi. Obrazni o‘sha kampirlarni kuzatgan holda yaratganman, deydi u.
Barno Teshaboyevaning aytishicha, “Alfiya kampir”ga ikki marta sovchi kelgan. Qashqadaryolik bir otaxon Alfiyaga uylanish niyatida ko‘rsatuv tahririyatiga xat yozgan.
— Qiziqchi Iskandar Hamroqulov menga doimo aytardi “Siz baxtlisiz, chunki siz nafaqat mashhur, balki sevimli hamsiz”, deb. Endi-endi ushbu so‘zlarning mag‘zini chaqyapman. Darhaqiqat, taniqlilar ko‘p, sevimlilar kam. Bilasizmi, meni ayniqsa, chollar yaxshi ko‘radi, deydi Barno Teshaboyeva.
Alfiya nima sababdan “Qalpoq”dan chiqib ketgan?
— Alfiya nega ketganini bilmayman. “Qalpoq”da chiqib tursa, tomoshabini ko‘p bo‘ladi. Bir marta tortishib qolganmiz. U ham Xadrada yotoqxonada turardi. Keyin oldiga bordim, “Men xalq uchun so‘rayapman sizdan, o‘ynab turing. Xalq yaxshi o‘ynagani uchun ataylab chiqarib yubordi”, deb o‘ylaydi, har xil odam bor deganim esimda.
Ko‘ngli ochiq ayol. Yo‘lda ketayotganimizda ham hammani kuldirib, kayfiyat berib yurardi. Kimdir uni yo‘ldan urdi, kimligini ham bilaman. Mayli, chuqurlashmaylik. Hozir internetda ko‘rinib turibdi, omadini bersin.
“Qalpoq” uniki ham, u bilan boshlaganmiz. “Qalpoq”ning bir-ikkita sonidan keyin, ko‘rsatuvga qo‘shilgan. “Yana kelaman”, deydigan bo‘lsa, marhamat. Boshqa talantli ijodkorlar ham qatnashmoqchi bo‘lsa, men jon-jon deyman, deydi “Qalpoq”dagi Maraymamat — aktyor Rahmonali Suropov.
“Umida Mirhamidovaning “Oq atirgullar” shu taronaning klipida chiqqanimda umuman boshqacha ko‘rinishda edim”
— Instagram’da shunaqa izoh keldi — bir obunachim: “Yoshsiz, chiroylisiz, xalqni xursand qilaman deb o‘zingizni kampirga almashtirib umringiz o‘tyapti. Bunaqa aktrisalar yo‘q, lekin qo‘rqmasdan o‘zingizni qari kampirga aylantirib umrini shu bilan o‘tkazib yubordingiz, haqiqiy aktrisa mana shunday bo‘ladi”, deb yozibdi.
O‘ylab qolaman, masalan, Umida Mirhamidovaning “Oq atirgullar” shu taronaning klipida chiqqanimda umuman boshqacha ko‘rinishda edim. Shunaqa chiroyli ko‘rinishlarda rol o‘ynasam bo‘lar edi, lekin unaqa qattiq afsuslanmayman. Bunaqa rollarda chiqayotgan aktrisalar juda ko‘p. Muxlislar ularni yaxshi eslay olmaydi. Shunaqa bo‘lgandan ko‘ra Alfiya kampir bo‘lib tanilganim ma’qul, deydi Barno Teshaboyeva.
Alfiyaning muxlislaridan kuniga minglab maktub keladi
— Instagram ochganimga ikki yildan oshdi. Undan oldin Telegram, Instagram, YouTube’larga umuman qiziqmaganman. Zamon talabi, busiz bo‘lmas ekan. San’atkormiz, bir joyga taklif tushsa, YouTube’da ko‘rsatuvlaringiz bormi, Instagram’da lavhalaringiz bormi, deb so‘rashadi. Bu o‘zimga ham ta’sir qila boshladi.
Instagram ochganimdan keyin Alfiyaning muxlislariga ko‘p ekanini bildim. “Dayrekt”imga bir kunda 500 ta, 1000 ta xabar keladi. O‘qisam, ko‘pchilik shogirdlikka olishimni so‘rab yozishgan bo‘ladi, deydi aktrisa.
Izoh (0)