Xorijiy OAVlar aktrisa Merilin Monroning o‘limiga oid yangi tafsilotlarni e’lon qildi. Dastlab, u dori vositalaridan dozani oshirib yuborgani sababli vafot etgan, deb qaralar edi.
Keyinchalik “Kennedilar va ular barbod qilgan ayollar” nomli kitobda aktrisa Jon va Robert Kennedilar istagiga ko‘ra o‘ldirilgan bo‘lishi mumkinligi haqida taxmin ilgari surildi. Chunki vafotidan biroz oldin u avval Jon, keyin esa Robert bilan ishqiy munosabatda bo‘lgandi.
Radar Online nashri Federal qidiruv byurosi (FBI) tergovining yangi tafsilotlarini ochiqladi. Unga ko‘ra, Monro Jon Kennedidan homilador bo‘lgan. Ta’kidlash kerakki, u o‘sha vaqtda yozuvchi Artur Miller bilan turmush qurgan edi. Miller xotinining xiyonat qilayotganini bilgan, biroq u bu ishda aktyor Iv Montandan gumon qilgan.
Kennedi bilan bo‘lgan munosabatlar doimo sir saqlangan, chunki bu uning obro‘siga jiddiy putur yetkazishi mumkin edi. U Monroni homilasini oldirishga majbur qilgan va rafiqasi bilan ajrashishni istamagan. Shuning uchun u Monroni o‘zining akasi Robertga “topshirgan”.
Ma’lumotlarga ko‘ra, aktrisa o‘limidan avval barcha haqiqatni matbuotga oshkor qilmoqchi bo‘lgan. Bu esa uning o‘ldirilishiga sabab bo‘lgan, degan taxminlar mavjud.
Izoh (0)