Taniqli aktrisa Asal Shodiyeva 6-aprel kuni 33 yoshni qarshi oldi. Bugungi kunda muvaffaqiyatli loyihalardagi turli obrazlari bilan tomoshabinlar mehriga sazovor bo‘lgan Asal san’atdagi faoliyatini qo‘shiqchilikdan boshlaganini ko‘pchilik bilmasa kerak.
Asal Shodiyeva 1992-yilning 6-aprel sanasida Toshkent shahrida tavallud topgan. U sanʼatga kirib kelgan ilk yillarida “O‘zbekistonim” nomli taronani ijro etgan. Aktrisa Uspenskiy nomidagi musiqaga ixtisoslashtirilgan maktabda tahsil olgan.
U otasi haqida deyarli gapirmagan, ko‘proq onasi, bobo, buvisi va singlisi haqida gapiradi. Asal Shodiyevaning sanʼatga kirib kelishida bobosi Mirzakalon Shodiyevning hissasi katta. U avvaliga xonanda bo‘lishni niyat qilgandi, ammo kutilmaganda rejalari o‘zgaradi.
— Ilk gonorarimni Ravil Botirovning “Jannat qaydadir?” filmidagi rolim uchun olganman. Davlat buyurtmasi asosida olingan filmdagi rolim uchun 400 ming so‘m gonorar berishgan. Filmda kichik rol ijro etishdan tashqari, saundtrekini ham duet tarzida ijro etgandim. 2008-yilda yosh qiz uchun bu kam gonorar emasdi, deydi aktrisa Asal Shodiyeva.
Keyinchalik Asal Shodiyeva aktrisalik sohasida o‘zini sinab ko‘rdi va aynan shu yo‘nalishda mashhurlikka erishdi.
“Janob hech kim”, “Uchar qiz”, “Uylanish”, “Hay-hay qizaloq”, “Majnun”, “Poyga”, “Vahshiy”, “Qaysar oshiqlar” aktrisa ijodidagi muvaffaqiyatli filmlar hisoblanadi. Aktrisa kinodagi faoliyatida tanaffus eʼlon qilganidan keyin “Soxta”, “Uchta so‘z” kabi taronalarni muxlislariga taqdim etdi.
U 2012-yili “Hay-hay qizaloq” filmida Yulduz rolini ijro etgan. Aktrisa mazkur rol uchun sochlarini antiqa tarzda kaltalatgan va rangli ulama sochlardan foydalangan. Hamisha nafis imijda ko‘ringan aktrisaning mazkur ko‘rinishi tezda eʼtiborni tortgan. U zamonaviylikka intiladigan va milliy qadriyatlarni unutgan qiz rolini mohirlik bilan ijro etgan.
— “Hay-hay qizaloq” filmini ko‘p marta tomosha qilganman. Boisi filmdagi rolim o‘zimga yoqadi. O‘ziga xoslik va yangicha yondashuv bor, deydi Asal Shodiyeva.
Asal Shodiyeva 2016-yilning 5-iyun sanasida xonanda Shohruxxon bilan turmush qurdi. Juftlikning to‘yida o‘zbek shou-biznesining ko‘plab taniqli vakillari, jumladan, O‘zbekiston xalq artisti Nasiba Abdullayeva, Ulug‘bek Rahmatullayev, Asilbek Amanulloh, Botir Qodirov, Jahongir Poziljonov, O‘zbekiston xalq artisti Yulduz Usmonova, Shahzoda va o‘zbek shou-biznesining boshqa vakillari ishtirok etgan. Qizig‘i shundaki, juftlik munosabatlarini uzoq muddat ommadan sir tutgan.
— Tanishuvimizga “Qo‘shig‘im” klipining syomkasi sabab bo‘lgan. Ungacha u qadar bir-birimizni yaqindan bilmasdik. Syomkadan so‘ng munosabatlarimiz iliqlashgan, deydi aktrisa.
Aktrisa Asal Shodiyeva turmush o‘rtog‘i Shohruxxondan 7 yosh kichik. U 1992-yilda, Shohruxxon esa 1985-yilda tavallud topgan. Hozirda Asal Shodiyeva va Shohruxxonning ikki nafar o‘g‘il farzandlari bor.
Asal Shodiyeva turmush qurganidan keyin kinofilmlarda suratga tushishni kamaytirdi va vaqtini oilasiga sarfladi. Ijodga qaytganidan keyin aktrisa turmush o‘rtog‘ining “Yurak”, “Gulim” taronalariga ishlangan videokliplarida suratga tushdi.
— Hozirgi vaziyatdan kelib chiqib aytishim mumkinki, ikki nafar farzandimiz bor, Asal ularga qarashi kerak, undan tashqari uyda ko‘p yumushlari bor, vaqti bo‘lmagani uchun ijodda biroz tanaffus qilishga to‘g‘ri keldi. Ijod qilishiga ruxsat ham, badiiy kengash ham bor, deydi aktrisaning turmush o‘rtog‘i Shohruxxon.
Asal Shodiyeva 2024-yilda yana faol ijodga qaytdi. U rejissyor Dilshoda Qosimovaning “Uyga qaytish” filmida, shuningdek, turmush o‘rtog‘i bilan birgalikda “Musiqa — bu sevgi” filmlarida suratga tushdi. Bundan tashqari aktrisa turli yirik kompaniyalar bilan reklama shartnomalari imzoladi.
Izoh (0)