Jizzax viloyatida yil boshidan beri 9,4 ming tonna chiqindidan mahsulot ishlab chiqarildi. Bu haqda viloyat Ekologiya boshqarmasi xabar berdi.
Ma’lum qilinishicha, viloyat hududida jami 13 ta maishiy chiqindilarni to‘plash poligonlari faoliyat yuritmoqda. Hozirda viloyat miqyosida maishiy chiqindilarni saralab, qayta ishlash faoliyati bilan shug‘ullanuvchi 24 ta korxona tomonidan 10,2 ming tonna chiqindi ikkilamchi xomashyo sifatida qayta ishlandi.
Joriy yilning 1-choragida 9,4 ming tonna chiqindidan mahsulot ishlab chiqarildi. Natijada viloyatda chiqindilarni qayta ishlash darajasi 15 foizga yetkazildi. Yil davomida chiqindilarni qayta ishlash hajmini oshirish evaziga qayta ishlash darajasini 45 foizga yetkazish kutilmoqda.
Viloyat Ekologiya, atrof-muhitni muhofaza qilish va iqlim o‘zgarishi boshqarmasi tomonidan 41 ta noqonuniy chiqindixonalar aniqlanib, 134 tonna chiqindining chiqindi poligonlariga olib borib joylashtirilishi ta’minlandi.
Bundan tashqari, hududlarda belgilanmagan joylarga noqonuniy chiqindixonalar tashkil etilishining oldini olish maqsadida 13 ta shahar va tumanlarda doimiy ravishda nazorat tadbirlari olib borildi. Unga ko‘ra, 760 ta holat aniqlanib, huquqbuzarlarga nisbatan 507 mln so‘m miqdorida jarima qo‘llanildi. Chiqindilardan bo‘lgan debitor qarzdorlik 1-yanvar holatiga 13,8 mlrd so‘mni tashkil etgan bo‘lsa, joriy yilning 1-aprelida 15,6 mlrd so‘mga yetdi.
Viloyatda ekologik barqarorlikni ta’minlash uchun 4 ta sanitar tozalash korxonalari faoliyat yuritib kelmoqda. “Toza hudud” DUK, DXSH asosidagi “Toza Eko Hudud” MCHJ va “Eko Sfera” MCHJ hamda klaster Eko-House MCHJlar balanslarida jami 227 ta maxsus texnikalari, 590 ta chiqindi konteynerlari mavjud.
O‘zbekistonda chiqindi poligonlari hududida chiqindilarni utilizatsiya qilish va qayta ishlashga ixtisoslashgan sanoat zonalari tashkil etiladi.
O‘zbekistonda yiliga 14 million tonna chiqindilar hosil bo‘ladi, lekin ularning atigi 4-5 foizi qayta ishlanadi. Chiqindi poligonlaridan 7 million tonnadan ziyod issiqxona gazlari atmosferaga chiqadi, 43 ming tonna zaharli filtratlar yer ostiga singadi. Chiqindilarni qayta ishlash orqali ham uning tabiatga ta’sirini kamaytirish, ham foyda olish mumkin.
2025-yil 24-mart kuni Toshkent shahri, Andijon, Namangan, Farg‘ona, Toshkent, Qashqadaryo va Samarqand viloyatlarida qattiq maishiy chiqindilarni yoqish orqali elektr energiyasi ishlab chiqarish investitsiya loyihalarini amalga oshirish chora-tadbirlari to‘g‘risidagi prezident qarorlari qabul qilindi. Unga ko‘ra, mazkur hududlarda ekologik vaziyatni yaxshilash, chiqindilarni qayta ishlash sohasiga zamonaviy yechimlar va texnologiyalarni joriy etish orqali elektr energiyasi ishlab chiqariladi hamda sohaga to‘g‘ridan to‘g‘ri investitsiyalar jalb etiladi.
Izoh (0)