Ko‘pincha biz uyda qanchalik ko‘p foydasiz narsalar to‘planib qolganini sezmaymiz ham. Bunday narsalardan voz kechish, uyda yangicha atmosferani paydo qilish bilan birga, sizga o‘ziga xos ruhiy yangilanishni ham baxsh etadi. Agar siz uyingizdagi ortiqcha narsalardan xalos bo‘lishga qaror qilgan bo‘lsangiz, qaysi narsalardan boshlash kerak.
Bo‘sh qog‘oz qutilar
Ba’zida biz texnika yoki poyabzaldan qolgan bo‘sh qutilarini uzoq vaqt saqlaymiz. Ammo yaqin vaqt ichida ko‘chish va qutilarga narsalarni joylashtirish rejangizda bo‘lmasa, ularni qayta ishlashga topshirish (yoki hatto tashlab yuborish) maqsadga muvofiqdir.
Kiyilmaydigan kiyim va poyabzallar
Javoningizdagi ushbu narsalar bir necha mavsumdan beri kiyilmay yotibdi. Balki sizga o‘lchami mos kelmay qolgandir, balki bunday hashamatli kechki libosda borishga joy topa olmayapsiz yoki bu narsalar sizga yoqmay qolgandir.
Bularning barchasi kiyim yoki poyabzaldan xalos bo‘lish uchun asosli sabablardir. Agar narsalar yaxshi holatda bo‘lsa, ularni sotib yuboring yoki ehson qiling, agar yo‘q bo‘lsa, tashlab yuboring yoki qayta ishlashga topshiring.
Taqilmayotgan taqinchoqlar
Uzoq vaqtdan beri taqilmay yotgan zargarlik buyumlari ham uyingizdan chiqib ketishga nomzoddir. Ularni do‘stingizga sovg‘a qiling yoki sotuvga qo‘ying.
Eski telefonlarning simlari va qoplamalari
Bo‘sh qutilardan keyin yana bir (tushunarsiz) odat — eski telefonlarning zaryadlovchi simlari va qoplamalarini saqlashdir. Tan oling, bularning hech biri sizga endi kerak bo‘lmaydi, shuning uchun simlarni axlat qutisiga (yaxshisi qayta ishlashga) tashlang.
Keraksiz qog‘ozlar
Keraksiz eski yozuvlar, kafolat varaqalari, shartnomalar — bularning barchasi ba’zi odamlarda o‘n yillar davomida saqlanib qoladi. Hoziroq barcha keraksiz qog‘ozlarni bir to‘plamga yig‘ib, eski zaryadlovchi qurilmalarga ergashtiring.
Muddati o‘tgan kosmetika va dori-darmonlar
Uyni “tartibga solish”dagi alohida (va zarur) nuqta bu kosmetika va dori-darmon qutilarini ko‘zdan kechirish va har bir vositani yaroqlilik muddatini tekshirishdir. Muddati o‘tgan kosmetik vositalar va tabletkalarni darhol chiqindi qutisiga tashlang.
Buzilgan (yoki keraksiz) o‘yinchoqlar
Uyda bolalar bo‘lsa, o‘yinchoq qutilarini ham diqqat bilan ko‘zdan kechirish kerak. Buzilgan o‘yinchoqlarni darhol tashlab yuboring, keyin esa bolangiz allaqachon ulg‘ayib o‘ynamay qo‘ygan o‘yinchoqlaridan ham xalos bo‘ling. Agar vaqt topib, keraksiz o‘yinchoqlarni eng yaqin bolalar uyiga olib borsangiz, juda yaxshi ish qilgan bo‘lasiz.
Singan idishlar
Uchlari va yonlari darz ketgan piyola yoki likopchalarni ham yo‘q qiling. Bunday idishlar nafaqat xunuk ko‘rinadi balki sog‘liq uchun ham zararlidir (chizilgan joylar zaharli moddalar chiqarishi mumkin).
Jufti yo‘qolgan narsalar
O‘zingizga yoqadigan paypoq, qo‘lqop yoki ziraklarni qanchalik yaxshi ko‘rsangiz ham, ularning bir poyi yo‘qolgan bo‘lsa, qolgan 1 poyini saqlashning ma’nosi yo‘q.
Zerikarli kitoblar
Uy kutubxonasi nafaqat bilim burchagi, balki chang yig‘uvchi joy ham hisoblanadi. Kitoblarni ko‘zdan kechiring va qaysi birini endi hech qachon qayta o‘qimasligingizni hal qiling. Keyin ularni do‘stlaringizga ulashing, sotib yuboring yoki kitob almashish joyiga olib boring.
Izoh (0)