Navoiy viloyatida ichimlik suvi va kanalizatsiya xizmatlari uchun iste’molchilardan 200 million so‘mdan ortiq pul olingani aniqlandi. Bu haqda Raqobat qo‘mitasi xabar berdi.
Qo‘mitaning Navoiy viloyati hududiy boshqarmasi tomonidan 2025-yilning yanvar oyida o‘tkazilgan o‘rganish va tahlillar natijasida viloyatda faoliyat yurituvchi tabiiy monopoliya subyekti hisoblangan “Elkimyo-Suvta’minot” MCHJ tomonidan ichimlik suvi yetkazib berish va kanalizatsiya xizmatlari uchun iste’molchilardan 200 million so‘mdan ortiqcha pul olingani aniqlandi.
Vazirlar Mahkamasining 722-sonli qarori bilan tasdiqlangan nizomiga muvofiq, narxlarni tartibga soluvchi organning narxni (tarifni) deklarasiya qilish (tasdiqlash) to‘g‘risidagi qarori tabiiy monopoliya subyekti tomonidan ular kuchga kirishidan 15 kun oldin ommaviy axborot vositalarida hamda o‘z rasmiy veb-saytlarida e’lon qilishi shartligi belgilab qo‘yilgan.
Yuqoridagi aniqlangan holatlarga muvofiq, hududiy boshqarma maxsus komissiyasi tomonidan “Raqobat to‘g‘risida”gi qonun hamda Vazirlar Mahkamasining 722-sonli qarori bilan tasdiqlangan nizom talablari buzilish alomatlari bilan “Elkimyo-Suvta’minot” MCHJga nisbatan ish qo‘zg‘atilib, natijasi yuzasidan belgilangan tartibda moliyaviy jarimalar qo‘llash haqida qaror qabul qilindi.
Shuningdek, iste’molchilarga ortiqcha hisoblangan 200 million so‘mdan ortiq mablag‘larni qayta hisob-kitob qilish bo‘yicha bajarilishi majburiy bo‘lgan ko‘rsatma berildi.
Bundan avval Namanganda chiqindi tashish xizmati uchun aholidan 18 milliard so‘mdan ortiq pul asossiz olingani aniqlangandi
Izoh (0)