Жиззах вилоятида йил бошидан бери 9,4 минг тонна чиқиндидан маҳсулот ишлаб чиқарилди. Бу ҳақда вилоят Экология бошқармаси хабар берди.
Маълум қилинишича, вилоят ҳудудида жами 13 та маиший чиқиндиларни тўплаш полигонлари фаолият юритмоқда. Ҳозирда вилоят миқёсида маиший чиқиндиларни саралаб, қайта ишлаш фаолияти билан шуғулланувчи 24 та корхона томонидан 10,2 минг тонна чиқинди иккиламчи хом ашё сифатида қайта ишланди.
Жорий йилнинг 1-чорагида 9,4 минг тонна чиқиндидан маҳсулот ишлаб чиқарилди. Натижада вилоятда чиқиндиларни қайта ишлаш даражаси 15 фоизга етказилди. Йил давомида чиқиндиларни қайта ишлаш ҳажмини ошириш эвазига қайта ишлаш даражасини 45 фоизга етказиш кутилмоқда.
Вилоят Экология, атроф-муҳитни муҳофаза қилиш ва иқлим ўзгариши бошқармаси томонидан 41 та ноқонуний чиқиндихоналар аниқланиб, 134 тонна чиқиндининг чиқинди полигонларига олиб бориб жойлаштирилиши таъминланди.
Бундан ташқари, ҳудудларда белгиланмаган жойларга ноқонуний чиқиндихоналар ташкил этилишининг олдини олиш мақсадида 13 та шаҳар ва туманларда доимий равишда назорат тадбирлари олиб борилди. Унга кўра, 760 та ҳолат аниқланиб, ҳуқуқбузарларга нисбатан 507 млн сўм миқдорида жарима қўлланилди. Чиқиндилардан бўлган дебитор қарздорлик 1 январь ҳолатига 13,8 млрд сўмни ташкил этган бўлса, жорий йилнинг 1 апрелида 15,6 млрд сўмга етди.
Вилоятда экологик барқарорликни таъминлаш учун 4 та санитар тозалаш корхоналари фаолият юритиб келмоқда. “Тоза ҳудуд” ДУК, ДХШ асосидаги “Тоза Эко Ҳудуд” МЧЖ ва “Эко Сфера” МЧЖ ҳамда кластер Eko-House МЧЖлар балансларида жами 227 та махсус техникалари, 590 та чиқинди контейнерлари мавжуд.
Ўзбекистонда чиқинди полигонлари ҳудудида чиқиндиларни утилизация қилиш ва қайта ишлашга ихтисослашган саноат зоналари ташкил этилади.
Ўзбекистонда йилига 14 миллион тонна чиқиндилар ҳосил бўлади, лекин уларнинг атиги 4-5 фоизи қайта ишланади. Чиқинди полигонларидан 7 миллион тоннадан зиёд иссиқхона газлари атмосферага чиқади, 43 минг тонна заҳарли филтратлар ер остига сингади. Чиқиндиларни қайта ишлаш орқали ҳам унинг табиатга таъсирини камайтириш, ҳам фойда олиш мумкин.
2025 йил 24 март куни Тошкент шаҳри, Андижон, Наманган, Фарғона, Тошкент, Қашқадарё ва Самарқанд вилоятларида қаттиқ маиший чиқиндиларни ёқиш орқали электр энергияси ишлаб чиқариш инвестиция лойиҳаларини амалга ошириш чора-тадбирлари тўғрисидаги президент қарорлари қабул қилинди. Унга кўра, мазкур ҳудудларда экологик вазиятни яхшилаш, чиқиндиларни қайта ишлаш соҳасига замонавий ечимлар ва технологияларни жорий этиш орқали электр энергияси ишлаб чиқарилади ҳамда соҳага тўғридан тўғри инвестициялар жалб этилади.
Изоҳ (0)