O‘zbekiston Superligasi 5-turi doirasidagi “Xorazm”—“OKMK” hamda “Paxtakor”—“Andijon” bahslari yakuniga yetdi. Urganchda kechgan bahs taqdirini yagona gol hal qilgan bo‘lsa, Toshkentdagi uchrashuvda jamoalar 5 ta gol urishdi.
Xorazmdagi uchrashuv qizg‘in kurashlar ostida boshlandi. Birinchi taymning 37-daqiqasida maydon egalari hisobda oldinga chiqib olishi mumkin edi, lekin Temur To‘xtasinov tomonidan belgilangan penaltini Dilshod Jo‘rayev aniq amalga oshira olmadi.
Ikkinchi taym ham qiziqarli vaziyatlar ostida o‘tdi. Uchrashuv yakuni arafasida Olmaliq klubi g‘alaba to‘pini kiritdi. 90+8-daqiqada Oybek Rustamov Asad Sobirjonovning ajoyib uzatmasidan keyin Sardor Qobuljonov qo‘riqlayotgan darvozani ishg‘ol qildi.
Shu tariqa Mirjalol Qosimov boshchiligidagi “OKMK” safardan 3 ochko bilan qaytdi. Hozirda olmaliqliklar 13 ochko bilan onlayn turnir jadvalida yetakchilik qilmoqda. “Xorazm” 6 ochko bilan 9-pog‘onani egallab turibdi.
Toshkentda bo‘lgan bahsda jamoalar 5 ta gol kiritishni uddalashdi. Uchrashuvning birinchi bo‘limida muxlislar gollarga guvoh bo‘lmadi. ammo ikkinchi taymda “Andijon” ketma-ket ikki marta Jonatan qo‘riqlayotgan darvozaga yo‘l topdi.
56-daqiqada Doniyor Abdumannopov hisobni ochgan bo‘lsa, 60-daqiqada Rustam Turdimurodov jamoasining ikkinchi goliga mualliflik qildi.
Oradan 8 daqiqa o‘tib, Igor Sergeyev tablodagi hisobni qisqartirdi. 81-daqiqada andijonliklar yana hisobdagi farqni ikkitaga yetkazib qo‘ydi. Gol muallifi — Luka Uskokovich. 84-daqiqada Bashar Resan “Paxtakor”ning ikkinchi golini kiritdi.
Uchrashuvning qolgan daqiqalari ham qizg‘in kurashlarga boy o‘tdi, ammo darvozalar boshqa ishg‘ol qilinmadi. Shu tariqa “Andijon” safardan 3 ochko bilan qaytdi. Qo‘lga kiritilgan g‘alabadan keyin Aleksandr Xomyakov jamoasi hisobidagi ochkolar soni 9 ta bo‘ldi va turnir jadvalining 4-pog‘onasidan joy oldi. “Paxtakor” 3 ochko bilan 13-o‘rinni egallab turibdi.
O‘zbekiston Superligasi
5-tur
13-aprel, yakshanba
“Xorazm” — “OKMK” 0:1
Gol: 0:1 — Oybek Rustamov (90+8)
“Paxtakor” — “Andijon” 2:3
Gollar: 0:1 — Doniyor Abdumannopov (54), 0:2 — Rustam Turdimurodov (60), 1:2 — Igor Sergeyev (68), 1:3 — Luka Uskokovich (81), 2:3 — Bashar Resan (84)
Izoh (0)