O‘zbekiston Superliganing yangi mavsumi 7-mart kuni start oladi. Bu haqda O‘zPFL matbuot xizmati xabar berdi.
Maʼlum qilinishicha, uchrashuvlar Sport TV hamda Futbol TV telekanallari orqali namoyish etiladi.
O‘zPFL hozirga qadar dastlabki ikki tur sanalariga aniqlik kiritgan bo‘lib, mart oyidagi FIFA kunlaridan keyingi rasmiy uchrashuvlar sanasi O‘zbekiston kubogining guruh bosqichiga qurʼa tashlanganidan so‘ng eʼlon qilinishini maʼlum qilgan edi.
“Paxtakor” xalqaro maydondagi yurishini davom ettirishi aniq bo‘lgach, uning 2-turdan o‘rin olgan “OKMK” klubiga qarshi bellashuvi 16-mart kuni o‘tkaziladigan bo‘ldi. Toshkent klubi OFK Elit Chempionlar ligasining 1/8 finali doirasida 4-mart kuni Saudiya Arabistonining “Al-Hilol” klubini qabul qiladi. Javob uchrashuvi 11-mart kuni Riyod shahrida o‘tkaziladi.
PFL rejasiga ko‘ra, “Paxtakor” 7-mart kuni “Mashʼal”ga qarshi uchrashuv bilan Superliga ilk turini boshlashi lozim edi. Biroq “Al-Sadd” bilan o‘yin yakuniga yetgach, klub “Al-Hilol”ga qarshi o‘yinlar rejasini ishlab chiqqan. Unga jiddiy tayyorgarlik ko‘rish maqsadida klub PFLga murojaat qildi. Murojaatda Superliga dastlabki turini boshqa sanaga qoldirish so‘ralgan.
O‘zPFL 2024-yilning oktyabr oyida ishlab chiqilgan taqvim rejada buning ehtimolini inobatga olgan bo‘lib, aprel oyining dastlabki sanalarini zaxira kuni sifatida belgilagandi. Shundan kelib chiqib, “Paxtakor” klubining so‘rovi qanoatlantirildi.
Shu tariqa Superliga yangi mavsumi 7-mart kuni “OKMK” — “Buxoro” o‘yini bilan start oladigan bo‘ldi. 8-9-mart kunlari bo‘lib o‘tadigan “Qizilqum” — “Surxon” hamda “Xorazm” — “Sho‘rtan” uchrashuvlari neytral maydonda o‘tishi va bunda har to‘rt jamoa futbolchilarining safarda bo‘lishi inobatga olinib, o‘yin vaqtlari belgilandi.
Izoh (0)